“Wall Street Journal”ın (WSJ) yazdığına görə, ABŞ-ın keçmiş prezidenti Co Baydenin səlahiyyət müddətinin son günlərində hazırlanan kəşfiyyatın qiymətləndirməsi belə nəticəyə gəlib ki, İsrail bu il İranın nüvə obyektlərinə irimiqyaslı hücumları nəzərdən keçirir. Qəzetin mövzu ilə bağlı məlumatlı mənbələrə əsaslanaraq verdiyi xəbərə görə, İsrailin keçən il İrandakı hərbi obyektlərə hücumlar nəticəsində İranın zəiflədiyini düşünərək, bu vəziyyətdən istifadə etməyi planlaşdırdığı bildirilib.
Hafta.az-ın yazdığına görə, səlahiyyətlilər, bu nəticələrin Bayden administrasiyasının səlahiyyət müddətini başa vuraraq yeni ilə girdiyi bir vaxtda hazırlanan analitik qiymətləndirməyə daxil edildiyini söyləyib. O, keçən il İranın hərbi potensialının pisləşməsindən sonra Yaxın Şərqdə yüksək riskli hərbi fəaliyyətin artması riskini vurğulayıb.
Məsələ ilə bağlı məlumatı olan iki mənbəyə görə, kəşfiyyat qiymətləndirməsi göstərir ki, İsrail hücumu dəstəkləmək üçün prezident Donald Tramp administrasiyasına lobbiçilik edəcək. Trampın İrana hücuma keçmiş prezident Baydendən daha çox qoşulmağa hazır olduğunu nəzərə alan İsrail Tehranın nüvə silahı əldə etmək cəhdini dayandırmaq fürsətini əldən verməkdən qorxur.
Qəzetin ABŞ rəsmisinə istinadən verdiyi məlumata görə, Amerika xüsusi xidmət orqanları Tramp administrasiyasının ilk günlərində İsrailin İranın nüvə obyektlərinə zərbələr endirməyi düşündüyünü təsdiqləyən ikinci hesabat hazırlayıb. Məlumata görə, ABŞ hərbi rəsmiləri İsrailin İranın nüvə obyektlərinə güclü hücumu üçün Pentaqonun hərbi dəstəyi və texnikasının tələb oluna biləcəyini düşünürlər.
Ötən ilin dekabrında İsrail mətbuatı hərbi rəsmilərə əsaslanaraq İsrail Hərbi Hava Qüvvələrinin İranın nüvə obyektlərinə mümkün hücuma hazırlığını davam etdirdiyini yazıb. İsrailin “Times of Israel” qəzetinə danışan rəsmilər bunun Yaxın Şərqdə Tehran tərəfdarı qrupların zəifləməsindən, Suriyada Bəşər Əsəd rejiminin süqutundan sonra baş verdiyini və ordunun İranın təcrid olunmasının onu nüvə proqramını sürətləndirməyə sövq edə biləcəyinə inandığını bildirib.
İsrail ordusu hazırkı vəziyyətin Yaxın Şərqdəki son dəyişikliklər, xüsusilə də İsrail Hərbi Hava Qüvvələrinə Suriyanın hava hücumundan müdafiə sistemlərinin əksəriyyətini məhv etməyə imkan verən Əsəd rejiminin süqutu çərçivəsində İranın nüvə obyektlərinə zərbə endirmək üçün bir fürsət olduğuna inanır.
