FHN-nin Həmkarlar İttifaqı Qəbələdə qaziləri mükafatlandırıb - FOTO

13:31 26.06.2022 Müəllif:Hafta.az
Yazını böyüt
Yazını kiçilt

Fövqəladə Hallar Nazirliyi İşçilərinin Həmkarlar İttifaqının təşkilatçılığı ilə 26 iyun Azərbaycan Respublikası Silahlı Qüvvələri Günü münasibətilə nazirliyin Mülki Müdafiə Qoşunlarının Qəbələ şəhərində yerləşən N saylı hərbi hissəsində 44 nəfər Vətən müharibəsi qazisinin iştirakı ilə tədbir keçirilib.

Tədbirdə Fövqəladə Hallar Nazirliyi işçilərinin Həmkarlar İttifaqının sədri Mehman İsmayılov, Azərbaycan Həmkarlar İttifaqları Konfederasiyasının sədr müavini Cavanşir Alxasov, Qəbələ Rayon İcra Hakimiyyəti başçısının müavini Arif Abdullayev, FHN-nin Şimal-Qərb Regional Mərkəzinin rəisi Sadiq Bəkirli və N saylı hərbi hissənin komandiri Rəşad Hacıyev, bir qrup zabit və əsgərlər iştirak edib.

İlk olaraq, dövlət himni səsləndirilib, daha sonra vətən uğrunda canlarının fəda etmiş şəhidlərin əziz xatirəsi bir dəqiqəlik sükutla yad edilib.

Mehman İsmayılov çıxış edərək Azərbaycan Respublikası Silahlı Qüvvələrinin yaranma tarixi barədə danışıb, hərbçi və əsgərləri, qaziləri, şəhid ailələrini bayram münasibətilə təbrik edib. Mehman İsmayılov bildirib ki, Ümummilli lider Heydər Əliyevin 22 may 1998-ci il tarixli fərmanına əsasən 26 iyun 1918-ci ildə Azərbaycan Xalq Cümhuriyyəti tərəfindən Milli ordunun yaradılması barədə tarixi qərarını əsas götürərək 26 iyun təqvimi Azərbaycanda Silahlı Qüvvələr Günü kimi qeyd edilməyə başlanılıb.

Mehman İsmayılov qeyd edib ki, bu gün Azərbaycanın qüdrətli və nizami orduya malik olması məhz Ulu öndərin gərgin zəhmətinin bəhrəsidir və Azərbaycan Silahlı Qüvvələri bu gün Müzəffər Ali Baş Komandan İlham Əliyevin rəhbərliyi altında öz şərəfli missiyasını uğurla davam etdirir: “Cənab Prezident İlham Əliyevin ordu quruculuğu sahəsində apardığı misilsiz işlər nəticəsində, həmçinin onun Azərbaycana rəhbərliyi dövründə sağlam və vətənpərvər gənc nəslin yetişməsinə verdiyi töhfələrin nəticəsi olaraq işğal altında olan torpaqlarımız Azərbaycanın peşəkar hərbiçilərinin və gənc vətənpərvər övladlarının şücaəti və fədakarlığı sayəsində 44 günlük əks-əməliyyat hücumu ilə işğaldan azad olundu”.

İttifaqın sədri çıxışında Prezident İlham Əliyevin şəhid ailələri, müharibə əlilləri və veteranlarının sosial təminatı, postmüharibə dövründə onlara sosial dəstək, məşğulluq, mənzil, fərdi ev və avtomobil təminatı istiqamətində gördüyü işlərə də toxunub.

Həmçinin, Mehman İsmayılov çıxışında şəhid ailələri, müharibə əlilləri və veteranlarına göstərilən diqqət və qayğıda ölkənin birinci xanımı, Azərbaycanın Birinci vitse-prezidenti, Heydər Əliyev Fondunun Prezidenti Mehriban xanım Əliyevanın fəaliyyətindən də bəhs edib. Qeyd edib ki, şəhid ailələri, müharibə əlilləri və veteranlarına müxtəlif səpkili problemlərin həllində, xüsusən onların sosial və tibbi reabilitasiya problemlərinin həllində Heydər Əliyev Fondunun rəhbəri kimi göstərdiyi xüsusi diqqət, təşəbbüskarlıq və fədakarlıqlar təqdirəlayiq haldır.

Mehman İsmayılov bildirib ki, FHN İşçilərinin Həmkarlar İttifaqı ənənəyə sadiq qalaraq Silahlı Qüvvələr Günü ərəfəsində Vətən Müharibəsinin 44 nəfər qazisinin Nabran qəsəbəsində istirahətini, 44 nəfər şəhid valideyninin Zəngilana səfəri və ağacəkmə aksiyasını təşkil edib. Həmçinin, sabah Qəbələdə 44 şəhid ailələri ilə görüş olacaq. Şəhid ailələrinə və qazilərə qayğı göstərilməsi üçün bu cür tədbirlərin davam etdiriləcəyini bildirən Mehman İsmayılov çıxışının sonunda bir daha görüş iştirakçılarını bu əlamətdar gün münasibətlə təbrik edib, onlara uğurlar arzulayıb.

Daha sonra Azərbaycan Həmkarlar İttifaqları Konfederasiyasının sədr müavini Cavanşir Alxasov, Qələbə rayon İcra Hakimiyyəti başçısının müavini Arif Abdullayev çıxış edərək şəhid ailələrinə, müharibə əlillərinə və iştirakçılarının sosial və mənəvi cəhətdən dəstəklənməsi üçün həyata keçirilən işlərdən söhbət açıb.

Tədbirin sonunda Fövqəladə Hallar Nazirliyi işçilərinin Həmkarlar İttifaqı adından Qəbələ rayonundan olan 44 nəfər Vətən müharibəsi qazisinə qiymətli hədiyyələr təqdim edilib.

Oxunma sayı 212