Moskvada kuryer maaşları yeni ildə 300 min rubla qədər yüksələ bilər.
Hafta.az-ın “Kommersant”a istinadən yazdığına görə, dekabrın ikinci yarısında çatdırılma xidmətlərinin qiyməti 1,5-2 dəfə arta bilər.
Moskvada Yeni il ərəfəsi sifarişləri üçün təxminən 15 min kuryer axtarılır. Lakin işçi qüvvəsi çatışmazlığı səbəbindən bağlama çatdırılmasında fasilələrin ola biləcəyi bildirilir.
Şirkətlərin yarısı çatdırılma işçilərinə ayda 200 min rubl maaş verməyə hazırdır. Nəqliyyat vasitəsi lisenziyası olan kuryerlərə ən azı 360 min rubl maaş təklif olunur.
Noyabrda bir növbəyə görə 7 min rubl ödənildiyi halda, dekabrda bu rəqəm 12 min rubla yüksəldilib.
Yeni il dövründə bağlama çatdırılmalarının artması yollarda sıxlığa və çatdırılma xərclərinin artmasına səbəb olacaq.
SDEK logistika məhsulları departamentinin rəhbəri Nikolay Paxomov dekabrın son həftəsində şirkətlərin bütün daşınma tələblərini ödəmək üçün resurslarının olmadığını bildirib. Ekspertlər yeni il bayramından sonra sektorda işçi çatışmazlığının artacağını proqnozlaşdırırlar.
2024-cü ilin əvvəlində 140 min olan işçi çatışmazlığının ilin sonunda 300 minə çatacağı təxmin edilir.
Sənaye və Ticarət Nazirliyinin verdiyi açıqlamaya görə, 2024-cü ilin yanvar-noyabr aylarında kuryerlərin orta aylıq əməkhaqqı 15 faiz artaraq 115,6 min rubla çatıb. Lakin artan tələb və kadr çatışmazlığı maaşların daha da artmasına səbəb olur.
Kuryer xidmətlərinin artan maaş təklifləri sektoru cəlbedici etsə də, əmək resurslarının digər sektorlardan uzaqlaşmasına səbəb olur.
