Sosial mediada hicabın məcburi taxılmasına qarşı nümayişlərə dəstək olaraq aclıq aksiyası keçirən həkim Fərhad Meysaminin arıqlayaraq tanınmaz hala düşdüyünü göstərən şəkillər yayılıb.
Hafta.az-ın Reuters-ə istinadən yazdığına görə, həkim Meysaminin görüntüləri həm İranda, həm də dünya ictimaiyyətində qəzəb yaradıb. Məhkumun vəkili bildirib ki, onun çox ciddi sağlamlıq problemi yaranıb və hətta həyatı təhlükədədir. O, Meysaminin 52 kiloqram arıqladığını bildirib.
Xatırladaq ki, 2018-ci ildən bəri hicab siyasətinə etiraz edən qadın fəalları dəstəklədiyinə görə həbsdə olan 53 yaşlı Fərhad Meysami hökumətin nümayişçilərin öldürülməsinə etiraz olaraq oktyabrın 7-də aclıq aksiyasına başlayıb.
Lakin İran məhkəməsi aclıq aksiyası ilə bağlı iddianı rədd edib və sosial mediada yayılan fotoların Meysamiyə aid olmadığını bildirib. Buna baxmayaraq, Fərhad Meysaminin Kərəc şəhərindəki "Rəcaişəhr" həbsxanasında saxlanıldığı deyilir.
Qeyd edək ki, sentyabrın 16-da polis nəzarətində olan iranlı kürd əsilli gənc qadın Məhsa Əmininin ölümündən sonra İran ümummilli etirazlarla sarsılıb və bu, 1979-cu il inqilabından sonra İslam Respublikasına qarşı ən güclü çağırışlardan biri olub.
Əmininin həbsdə ölməsindən sonra etirazlarda qadınların böyük rolu olub, onların çoxu hicablarını açıb və ya yandırıb.
Hüquq müdafiəçiləri 600-dən çox etirazçının öldürüldüyünü, 20 minə yaxınının isə həbs edildiyini bildirib. İran ədliyyə orqanlarının məlumatına görə, azı dörd nəfər edam edilib.
Vaşinqtonun İran üzrə xüsusi nümayəndəsi Robert Malli Tvitter hesabında “Həbsxanada aclıq aksiyası keçirən qadın hüquqlarının cəsur müdafiəçisi Dr Fərhad Meysaminin şokedici görüntüləri” yazıb.
“İran rejimi onu və minlərlə siyasi məhbusu haqsız yerə hüquq və azadlıqlarından məhrum edib. İndi haqsız yerə onun həyatına təhlükə yaradır”, - ABŞ rəsmisi qeyd edib.
BBC-nin Fars Xidməti tərəfindən dərc edilən məktubda Meysami üç tələb irəli sürüb: edamlara son qoyulması, siyasi və mülki məhbusların azad edilməsi, “məcburi hicab təqiblərinə” son qoyulması.
"Mən qeyri-mümkün missiyamı davam etdirəcəyəm, ümid edirəm ki, bu, daha sonra kollektiv səylə mümkün ola bilər", - cənab Meysami deyib.
Bu arada, məlumata əsasən iranlı kinorejissor Cəfər Pənahi də hakimiyyət orqanlarının onu yenidən mühakimə olunanadək müvəqqəti zaminə buraxmaqdan imtina etməsinə etiraz olaraq həbsxanada aclıq aksiyasına başlayıb. O, iyulda saxlanılıb.
