İsrailin Qəzza zolağına humanitar yardım daşınmasına tətbiq etdiyi blokada Fələstin anklavında 52 uşağın aclıqdan ölməsinə səbəb olub.
Hafta.az xəbər verir ki, bu haqda Türkiyənin "Sabah" nəşri məlumat yayıb.
Qəzzanın səhiyyə nazirinin müavini Yusuf Əbu əl-Riş təcili xəbərdarlıq edib ki, zəruri dərmanların 59%-i və tibbi ləvazimatların 37%-i tükənib. Bundan əlavə, 13 min xəstə Qəzzadan kənarda müalicəyə ehtiyac duyur. Evakuasiya edilməsə, onların vəziyyəti ciddi şəkildə pisləşəcək.
Blokada xüsusilə uşaqlar arasında qida çatışmazlığına və anemiyaya səbəb olub. 2023-cü il oktyabrın 7-də başlayan müharibədən bəri Qəzzada 273 yeni doğulmuş körpə bombardmanlar nəticəsində həlak olub.
Xəstəxanalar həddindən artıq doludur. Hər kəs üçün kifayət qədər oksigen yoxdur. Avadanlıq çatışmazlığı və elektrik enerjisinin kəsilməsi bir çox tibbi prosedurları qeyri-mümkün edib və səhiyyə sistemini çöküş həddinə çatdırıb.
Təcili yardım maşınları və humanitar yardım işçiləri İsrail əsgərləri tərəfindən hücuma məruz qalır, yaralılara və xəstələrə yardım göstərməyə imkan vermirlər. Su təchizatı sisteminin sıradan çıxması yoluxucu xəstəliklərin yayılmasına səbəb olub.
Həkim və tibb bacılarının çatışmazlığı vəziyyəti daha da ağırlaşdırır. Həkimlər ekstremal şəraitdə işləyirlər. "Sağlamlıq lüks deyil. Bu, beynəlxalq hüquqla qorunan əsas hüquqdur. Beynəlxalq ictimaiyyətin bu humanitar fəlakətə son qoymasının vaxtı çatıb", - deyə Ramallahdakı Fələstin Səhiyyə Nazirliyindən bildirilib.
