II Dünya Müharibəsi və ya Böyük Vətən Müharibəsinin başa çatmasının 80 illiyinə iki həftədən bir az artıq vaxt qalmış məlum olub ki, Tacikistanda 18 aprel gününədək cəmi 17 Böyük Vətən Müharibəsi iştirakçısı sağ qalıb.
Hafta.az-ın yazdığına görə , bu barədə “Asiya-Plus”a Tacikistan Müharibə və Əmək Veteranları Şurasından məlumat verilib.
Şuranın məlumatına görə, ötən il müharibə iştirakçılarının sayı 24 olsa da, son bir ildə onlardan yeddisi vəfat edib.
Böyük Vətən Müharibəsi veteranlarının ən çoxu hazırda Xatlon vilayətində 8 nəfər, Suqd vilayətində 2, Düşənbə şəhərində 2 və digər rayonlarda toplam 5 nəfər yaşayır.
Müharibənin ən yaşlı iştirakçısı isə Hisar şəhərinin Şoxəmbəri kəndində yaşayan 1912-ci il mayın 9-da anadan olmuş Rəşid Kərimovdur ki, bu il onun 113 yaşı tamam olacaq.
Şəhrinav sakini Əziz Kodirov bu il 103 yaşını, Boxtar şəhər sakini Səfərəli Fayzəliyev isə mayın 9-da 102 yaşını qeyd edəcək.
Düşənbədən olan Muxtar Zərgərov aprelin 29-da 101, Abdurahmoni Comi rayonundan olan Gülmurod Taqoyev isə mayın 1-də 101 yaşını qeyd edəcək.
Digər müharibə veteranı, Dəvəştiç rayonunun Navobod kənd sakini Nozim Nosirov da bu il 101 yaşını qeyd edəcək.
Respublika Müharibə və Əmək Veteranları Şurasının məlumatına görə, aprelin 14-nə olan məlumata görə, ölkədə Böyük Vətən Müharibəsindən olan 134 nəfər arxa xidmət əməkdaşı sağ qalıb.
Qeyd edək ki, hər il mayın 9-da və iyunun 22-də Tacikistanda 1941-1945-ci illər Böyük Vətən Müharibəsi iştirakçılarının xatirəsi anılır. Tədbirlər çərçivəsində müharibə veteranlarına müəyyən məbləğdə birdəfəlik maddi mükafat və sair təqdim edilir.
Bu il veteranlara nə qədər vəsaitin ayrılacağı hələlik məlum deyil. Ötən il Qələbə Günü münasibətilə hər bir müharibə iştirakçısına respublika və yerli büdcələrdən 50 min somoniyə yaxın pul mükafatı verilib. Bunun 40 min somonisi prezident Emomali Rahmon tərəfindən ayrılıb, qalan pul mükafatını isə Düşənbə, Suqd və Xatlon vilayətlərinin rəhbərləri öz rayonlarında yaşayan veteranlara əlavə olaraq ödəyib (5-10 min somoni arasında).
Yada salaq ki, Tacikistandan Böyük Vətən Müharibəsi cəbhəsinə 300 minə yaxın insan göndərilib, onlardan 92 mini həlak olub və ya itkin düşüb.
2005-ci ildə Tacikistanda İkinci Dünya Müharibəsi veteranlarının sayı 9900 nəfər idisə, 2020-ci ildə onlardan 168 nəfər, 2021-ci ildə 98 nəfər, 2022-ci ildə 59 nəfər, 2023-cü ildə 42 nəfər, 2024-cü ildə isə 24 nəfər, bu il isə günümüzədək 17 nəfər sağ qalıb.
