Kiyevə səfərlə bağlı yekun qərarı fevralın 17-də ABŞ prezidenti Co Bayden verib, Ağ Evdə və Pentaqonda çoxlarının səfərdən xəbəri yox idi. Bu barədə mənbələrə istinadən Bloomberg məlumat yayıb.
Bayden fevralın 20-də elan olunmamış səfər üçün Kiyevə səfər edib. Amerika lideri səhər saat 8 radələrində Polşadan qatarla Ukraynaya gəlib, Ukrayna prezidenti Vladimir Zelenski ilə görüşüb, şəhərin mərkəzini gəzib və Vaşinqtonun Kiyevə dəstəyini davam etdirəcəyinə söz verib.
Bloomberg-in məlumatına görə, Vaşinqtondan uçan təyyarədə Baydeni milli təhlükəsizlik üzrə müşaviri Ceyk Sallivan, həmçinin səfəri gizli saxlamağa söz verən iki jurnalist müşayiət edib. Qeyd olunur ki, səfərdən bir neçə gün əvvəl jurnalistlər “Qolf turnirinə gəlmək üçün təlimatlar” başlıqlı elektron məktubda səfərlə bağlı məlumat alıblar.
Sallivanın sözlərinə görə, ABŞ mümkün münaqişənin qarşısını almaq üçün Baydenin Kiyevə səfəri barədə Rusiyanı səfərdən bir neçə saat əvvəl xəbərdar edib.
