Jefferies International investisiya bankının strateqi Durukal Günün hazırladığı son hesabatda ABŞ administrasiyasının Türkiyəyə dollar mübadiləsi xətti təklif edə biləcəyi irəli sürülür.
Hafta.az yazır ki, “Bloomberg”in məlumatına görə, təhlildə Vaşinqtonun qarşıdan gələn seçkilərdən əvvəl Türkiyənin zəif valyuta ehtiyatlarını və maliyyə bazarlarına inamı gücləndirmək istəyə biləcəyi bildirilir.
Hesabatda qeyd olunur ki, indiyə qədər Türkiyə və ABŞ iqtisadi rəsmiləri arasında mübadilə danışıqları aparılmasa da, Argentinadakı kimi valyuta mübadiləsi dəstəyinin təmin edilməsi olduqca rasional və ağlabatandır.
Keçən il ABŞ Maliyyə Nazirliyi Argentina Mərkəzi Bankı ilə 20 milyard dollarlıq mübadilə müqaviləsi bağlayaraq, Xavyer Miley hökumətini dəstəkləmək üçün bazardan birbaşa peso alıb. Tramp administrasiyası tərəfindən bazarları sabitləşdirmək və milli valyutanın qəfil dəyərdən düşməsinin qarşısını almaq üçün ara seçkilərdən bir az əvvəl Argentinada tətbiq edilən bu metodun Türkiyə iqtisadiyyatı üçün oxşar qoruyucu qalxan yarada biləcəyi irəli sürülüb.
Strateq Durukal Gün ABŞ-ın belə bir addımının Türk lirəsinə düşən devalvasiya təzyiqini birbaşa azaldacağını, inflyasiya gözləntilərini nəzarət altına alacağını və yerli bazarda dollarlaşma meylini dayandıracağını bildirib.
Həmçinin, son aylarda artan maliyyə risklərinin qiymətləndirilməsi səbəbindən yüksəliş tendensiyasında olan Türkiyənin beş illik kredit riski mükafatının (CDS) bu razılaşma sayəsində endirilə biləcəyi iddia edildi. Qlobal bazarlarda Türkiyə aktivləri ilə bağlı fyuçers alətlərində 1,39 faiz azalma qeydə alınsa da, potensial svop xəttinin bu yaxşılaşmanı daimi edə biləcəyi bildirildi.
