"Biz Azərbaycanla mədəni körpülər qurmaq üçün daha çox tədbirlər keçirəcəyik" - Viya Buşa

16:50 23.02.2024 Müəllif:Vüsal Tağıbəyli
Yazını böyüt
Yazını kiçilt

Latviya Avropa İttifaqının (Aİ) Milli Mədəniyyət İnstitutları (EUNIC) klasterinin üzvləri ilə Azərbaycan arasında mədəni əməkdaşlığı inkişaf etdirmək niyyətindədir.

Hafta.az-ın yazdığına görə, bu barədə Latviyanın ölkəmizdəki səfirliyinin müşaviri Viya Buşa jurnalistlərə açıqlamasında bildirib.

“Şadıq ki, sədrliyimiz dövründə klasterdə daha çox yeni üzvlər və assosiativ üzvlər meydana çıxdı - Gürcüstan və Moldova assosiativ üzv, Ukrayna isə klasterin tərəfdaşı olub. Bu o deməkdir ki, biz mədəniyyətimizin təşviqi, ölkələrimizlə Azərbaycan arasında mədəni körpülər qurmaq üçün daha çox tədbirlər keçirə biləcəyik”, - o qeyd edib.

V.Buşanın sözlərinə görə, klasterin genişləndirilməsi və Ukraynaya tərəfdaş statusunun verilməsi, Rusiyanın Ukrayna torpaqlarına qarşı hərbi təcavüzünün başlamasının ikinci ildönümünü nəzərə alaraq, Latviya səfirliyi üçün simvolik hadisədir: “Bu, çox simvolikdir və həmrəylik nümayiş etdirir. Xüsusi ilə vurğulamaq istərdim ki, Aİ nümayəndəliyi klasterin üzvü deyil, lakin onlar bizim strateji tərəfdaşlarımızdır. Biz Aİ-nin Azərbaycandakı nümayəndəliyi ilə bütün fəaliyyətlər üzrə sıx əməkdaşlıq edirik, burada Aİ mədəniyyətini Azərbaycanda təmsil edirik və ümumi layihələr yaradırıq”.

Xatırladaq ki, Çexiya, İspaniya, Latviya, Litva, Macarıstan, Nederland, Polşa, Slovakiya, Rumıniya və Yunanıstan səfirlikləri, eləcə də British Council EUNİC (AİMMİ) Azərbaycan Klasterinin üzvləridir. AI-nın Azərbaycandakı Nümayəndəliyi EUNİC CLUSTER Azerbaijanin strateji tərəfdaşıdır.
Oxunma sayı 585