“Bu, əslində ölkə olaraq Fransanın problemidir. Çünki Fransa özü üçün müqəddəs saydığı insanlarının tarixdə hansı yolu keçdiyinə bir də nəzər yetirməlidilər”.
Bunu hafta.az-a “Yeni Xətt” Siyasi Tədqiqatlar Mərkəzinin rəhbəri Ramil Hüseynov Fransa prezidenti Makronun Azərbaycanla bağlı son bəyanatına diqqət çəkərkən bildirib.
Mərkəz rəhbəri Qərbin, Avropanın böyük ölkələrindən biri olan, Avropanın mərkəzində formalaşan, inkişaf edən Fransanın bir diasporanın girovu, siyasi təsir mexanizmləri altında fəaliyyət göstərməsinə təəssüflə yanaşıb.
“Ermənistan işğalçı, terrorçu dövlətdir. Ermənistanın rəhbərliyində olan şəxslər vandal təfəkkürə malik insanlardır. Çünki onların tarix boyu Azərbaycana qarşı olan mövqeləri dəyişməz qalıb, uzun illərdir eyni qaydada torpaq iddiasını davam etdirirlər. İnkişaf etmiş bir ölkənin, özünü dünyada sivil bir ölkə kimi qələmə verən bir siyasi rejimin bu gün bütün bunları nəzərə almadan Ermənistana dəstək verməsi heç də başadüşülən deyil. Maraqlı nüans ondan ibarətdir ki, əslində öz torpaqlarını işğaldan azad edən Azərbaycanın artıq yalnız regionda deyil, dünyada qlobal bir gücə çevrilməsi dönəmində Fransanın ölkəmizə qarşı qərəzli münasibətdə olması bu ölkənin cılız mahiyyətini ortaya qoyur”.
R.Hüseynov hesab edir ki, özünü demokratik dəyərlərin daşıyıcısı, sivil cəmiyyət, müasir düşüncəni təbliğ edən, dövlət kimi göstərən Fransa terror, vandal təfəkkürünə malik ölkənin yanında dayanmaqla özünün mahiyyətini açmış olur.
“Terrorçu, vandal Ermənistanın yanında duraraq Azərbaycana qarşı qərəz göstərmək Fransa tarixində ən ciddi nöqsandır. Azərbaycan tərəfi bu qərəzli münasibəti unutmayacaq və gələcəkdə hansısa siyasi əməkdaşlıq məsələlərində bunu bir daha nəzərdən keçirəcək”.
Bununla belə Mərkəz rəhbəri Azərbaycanın müstəqil şəkildə öz siyasətinə davam edəcəyini deyib.
“Əminəm ki, Fransanın qərəzli yanaşmaları başqa dövlətlərin Azərbaycana qarşı münasibətlərinə təsir etməyəcək. Zaman gələcək, Fransa, Ermənistanın digər havadarları Azərbaycanla münasibətdə öz davranışlarında korrektələr etməli olacaqlar. Dünya yaxşı bilir ki, Azərbaycan torpaqlarını işğaldan azad edib, haqlı mübarizəsində qalib gəlib, ədaləti bərpa edib. Əminik ki, Fransanın Azərbaycana qarşı Makron siyasəti bu dövlətin tarixində biabırçı şəkildə qeyd olunacaq”.
