Liviya, Əlcəzair və Tunis liderləri ölkələri arasında təhlükəsizlik və iqtisadi problemlərin aradan qaldırılması üçün üç aydan bir görüş keçirməyi qərara alıblar.
Hafta.az-ın yazdığına görə, Liviya Prezident Şurasının sədri Məhəmməd əl-Mənfi Əlcəzairdə keçirilən 7-ci Qaz İxrac Edən Ölkələr Forumu Zirvəsi çərçivəsində Əlcəzair prezidenti Əbdülməcid Tebbun və Tunis prezidenti Kays Səidlə görüşüb.
Görüşdə Fələstində baş verən son hadisələr və regional məsələlər müzakirə edilib.
Mənfi, Tebbun və Səid ölkələri arasında təhlükəsizlik və iqtisadi problemlərin aradan qaldırılması üçün səyləri birləşdirəcəklər və onlar Ramazandan sonra ilk görüşü Tunisdə keçirmək qərarına gəliblər.
Liviya, Əlcəzair, Tunis, Mərakeş və Mavritaniya 1989-cu ildə viza liberallaşdırılması, təhlükəsizlik koordinasiyası və müxtəlif sahələrdə ortaq siyasətləri müəyyən etmək üçün Ərəb Məqrib İttifaqını qurublar. Lakin müxtəlif fikir ayrılıqları səbəbindən birlik öz təsis məqsədini yerinə yetirəcək funksiya qazana bilməyib. 1994-cü ildə Tunisdə keçirilən sammitdən sonra liderlər sammiti keçirməyib.
