Meksika və Braziliya liderləri dünən iki ölkə arasında ticarət əlaqələrini gücləndirmək niyyətində olduqlarını açıqlayıblar. Latın Amerikasının bu iki ən böyük iqtisadiyyatı ABŞ prezidenti Donald Trampın qlobal bazarlarda qarışıqlığa səbəb olan ticarət siyasətindəki çətinliklərə qarşı mübarizə aparmağı hədəfləyir.
Hafta.az-ın yazdığına görə, Meksika prezidenti Klaudiya Şeynbaum və Braziliya prezidenti Luiz İnasio Lula da Silva Mərkəzi Amerika ölkəsi Hondurasda keçirilən regional sammit çərçivəsində görüşüblər. Sammitdə iştirak edən liderlər Trampın tariflərinə necə reaksiya veriləcəyini, deportasiyaların artırılmasını və digər məsələləri müzakirə ediblər.
Braziliya Prezidenti Lula da Silva X platformasında verdiyi açıqlamada, "Biz Braziliya və Meksikada hökumətlərimiz və biznes sektorlarımız arasında müntəzəm görüşləri təşviq etməklə ölkələrimiz arasında əlaqələri gücləndirmək qərarına gəldik" deyib.
33 ölkədən ibarət Latın Amerikası və Karib Hövzəsi Dövlətləri Birliyinin (CELAC) 11 üzvünün lideri və 20 ölkə nümayəndəsinin qatıldığı sammitində qlobal gərginliyin davam etdiyi bir vaxtda regional mübahisələrin həllinə çağırış edilib.
"Bu gün Latın Amerikası və Karib hövzəsinin birliyə və həmrəyliyə hər zamankindən daha çox ehtiyacı olduğunu qəbul etmək üçün yaxşı vaxtdır" deyib Meksika prezidenti Şeynbaum sammitdə.
ABŞ prezidenti Donald Tramp dünən Çindən başqa əksər ölkələrə əlavə gömrük rüsumlarını 90 gün müddətinə dayandıracağını, Çinlə ABŞ arasında ticarət müharibəsini 125 faizlik yeni tariflərlə yeni səviyyəyə qaldıracağını açıqlayıb.
