Səudiyyə Ərəbistanının informasiya naziri Salman Dusari ölkə mediasının inkişafına dəstək məqsədilə beş yeni layihəyə start verib. Hökumət və özəl sektor arasında tərəfdaşlığın gücləndirilməsi məqsədilə Səudiyyə Ərəbistanının müxtəlif regionlarından 200-ə yaxın ekspertin iştirak etdiyi nazirliyin media tərəfdaşlarının ilk toplantısında layihələr müzakirə edilib.
Hafta.az-ın yazdığına görə, Dusari, görüşün Səudiyyə Ərəbistanının 2030-cu il hədəflərinə, xüsusilə də insan kapitalının inkişafına nail olmaq üçün hökumət və özəl sektordan olan müxtəlif tərəfdaşlarla əlaqələri dərinləşdirmək marağından qaynaqlandığını deyib. Səudiyyə Ərəbistanı milli istedad və səriştələrə sərmayə qoymaq, innovasiya və sahibkarlıq mədəniyyətini dəstəkləməklə yüksək məhsuldar milli istedadların rəhbərlik etdiyi firavan iqtisadiyyata nail olmağı hədəfləyir.
Yeni layihələr arasında Səudiyyə Ərəbistanının reklam sənayesinin inkişafı və istedadlı insanlara rəqəmsal reklam sahəsində bacarıqlarını təkmilləşdirməyə imkan verən Kommunikasiya Akademiyası və “İgnite” təşəbbüsü ilə həyata keçirilən “Communication+” layihəsi daxildir. Digər layihə isə yerli və ərəb media qurumlarına rəhbərlik üçün yeni nəsil liderləri gücləndirmək məqsədilə Media Liderliyi Təlimi layihəsi idi. Bundan əlavə, müxtəlif media sənətlərinin tətbiqi üçün ümumi iş mühitinin təmin olunması, müasir metodlarla media bilik və bacarıqlarının inkişaf etdirilməsi üçün Mediazone layihəsi yeni layihələr arasında öz yerini tutub. “Speakers” layihəsi müxtəlif təlim proqramları vasitəsilə dövlət qurumları və özəl sektor liderlərinin media bacarıqlarının artırılmasına yönəlmiş yeni layihədir.
Görüşdə İnformasiya Nazirliyinin Hökumət Kommunikasiya Mərkəzi ilə İnsan Resurslarının İnkişafı Fondu (HADAF) arasında əməkdaşlıq müqaviləsi imzalanıb. Bu çərçivədə milli kadrlar hazırlanacaq, onlar rəqəmsal məzmun sənayesində işləyə və media sektoru peşələri ilə tanış ola biləcəklər. Onlar rəqəmsal reklam, rəqəmsal oyunlar, rəqəmsal video və rəqəmsal audio sahələrində performanslarının yaxşılaşdırılmasına töhfə verəcəklər.
Əməkdaşlıq həmçinin HADAF proqramlarından və məhsullarından faydalanmağa kömək edir. O həmçinin gəlir dəstəyi, peşəkar peşə sertifikatlaşdırma dəstəyi, “Tamheer” iş yerində təlim, bacarıqlar və milli elektron təlim platforması (Doroob) kimi proqram və məhsullardan faydalanmağı dəstəkləyir.
