Yanvarın 10-da axşam İrandan Rusiyaya yeni yük təyyarəsi gəlib. Söhbət "Şahed" dronlarının və onların ehtiyat hissələrinin tədarükündən gedə bilər. Beləliklə, düşmənin kamikadze pilotsuz təyyarələrinin buraxılışları davam edəcək.
Hafta.az “TSN”-ə istinadla xəbər verir ki bu barədə telemarafon zamanı Ukraynanın cənubundakı Müdafiə Qüvvələrinin nümayəndəsi Natalya Qumenyuk danışıb.
Onun sözlərinə görə, təyyarənin Tehrandan Moskvaya gəlməsi həm PUA-ların, həm də onların ehtiyat hissələrinin tədarükünün uzadılmasından xəbər verə bilər.
"İranın terrorçu ölkəyə dəstəyi davam edir. Bu o deməkdir ki, yeni pilotsuz təyyarələr buraxılış üçün hazırlana bilər. Düşmən, demək olar ki, hər gecə Ukrayna ərazisinə hücum edir və bu cür hücumlar üçün gecə vaxtından istifadə edir. Son iki gecə, böyük ehtimalla hava şəraiti səbəbindən o qədər də olaylı olmayıb, çünki dronlar həddindən artıq soyuqdan “qorxur”lar”, - deyə Qumenyuk bildirib.
Eyni zamanda, Qumenyuk qeyd edir ki, Ukraynaya qarşı məqsədyönlü hücumlar dayanmır. Ruslar dronlardan minimal miqdarda da istifadə edirlər.
"Terror davam edir və düşmənin hava hücumundan müdafiə sistemlərini gərginlikdə saxlamaq cəhdi açıq şəkildə göstərir ki, bu cür hücumlar davam edə bilər və rahatlaşmaq üçün hələ tezdir", - Ukrayna Silahlı Qüvvələrinin nümayəndəsi vurğulayıb.
Xatırladaq ki, “Sky News” təhlükəsizlik sahəsindəki mənbəsinə istinadla İranın Ukraynaya hücumlardan ötrü Rusiya üçün yeni “Shahed” PUA modelini hazırladığını bildirib. Yeni "Şahed-107"-nin uçuş məsafəsi 1500 km-ə qədərdir. O, video ötürülməsi üçün ötürücü ilə təchiz olunacaq.
