İsveçrədəki Katolik Kilsəsi ilə bağlı rəsmi araşdırma 1950-ci illərdən bəri təxminən 1000 cinsi zorakılıq hadisəsi müəyyən edib. Hadisələrin əksəriyyətində uşaqların iştirak etdiyi bildirilsə də, istintaq hesabatında qurbanların 56 faizinin kişi olduğu vurğulanıb.
Hafta.az-ın yazdığına görə, Sürix Universitetinin tədqiqatçıları da “hadisələri ört-basdır etmək cəhdlərinin geniş yayılmasına” dair sübutlar tapıblar. "Müəyyən etdiyimiz hallar, şübhəsiz ki, aysberqin görünən hissəsidir" deyib hesabat müəllifləri.
Monika Dommann və Marietta Mayer kilsənin tələbi ilə bir il davam edən araşdırmadan sonra hesabat yazıblar.
Tədqiqatçılara kilsə arxivlərinə giriş imkanı verilib və həmçinin cinsi zorakılığın bəzi qurbanları ilə müsahibələr aparıblar. Lakin Domann və Mayer onlara “çoxsaylı” digər sənədlərə giriş imkanı verilmədiyini söyləyib.
Müstəntiqlər iki yeparxiyada qeydlərin məhv edildiyinə dair sübutlar tapdıqlarını və hər bildirilmiş cinsi zorakılıq halının qeydə alınmadığını və arxivləşdirilmədiyini söyləyib.
Dommann və Mayer, "Tədqiqatdan öyrəndiklərimizə görə, faktların yalnız kiçik bir hissəsi bildirilir" deyib. Diqqətə çatdırılıb ki, təqib hallarının yarıdan çoxu etiraflar, kilsə funksiyaları, uşaq klublarında və fondlarda dini maarifləndirmə zamanı baş verib.
Sui-istifadə hallarının 30 faizinin kilsə uşaq evləri, internat və gündüz məktəblərində baş verdiyi vurğulanıb.
Mütəxəssislər cinsi istismar hadisələrini sənədləşdirməklə yanaşı, kilsə rəsmilərinin bu hallara cavab olaraq nə etdiklərini də araşdırıblar. Bir çox hadisələrin “gizlədildiyi, ört-basdır edildiyi və ya əhəmiyyətsiz kimi göstərilməyə çalışıldığı” üzə çıxıb.
Hesabatda bəzi dini məmurlar, o cümlədən kardinallar cinsi zorakılığa məruz qalanlar üçün daha çox iş görmədiklərinə görə tənqid edilib. Bildirilir ki, sui-istifadədə ittihamlanan din xadimləri “sistemli” olaraq hələ də səlahiyyətlərinin qalacağı başqa yerlərə, bəzən isə istintaqdan yayınmaq üçün ölkədən kənara köçürülüblər. Həmçinin deyilirdi ki, “Bununla Katolik Kilsəsinin və onun hakimiyyət orqanlarının maraqları cəmiyyətin təhlükəsizliyi və rifahından üstün tutuldu”.
Tədqiqatçılar müxtəlif cinsi qısnama qalmaqallarının ortaya çıxmağa başladığı 21-ci əsrə qədər münasibətin dəyişmədiyini də bildirirlər.
