Çin Enerji Korporasiyasının sədri Zhang Jianhua, ölkəsinin 2024-cü ilin ilk altı ayında Rusiyadan 55 milyon ton neft idxal etdiyini açıqlayıb.
Hafta.az-ın yazdığına görə, bu barədə məlumat Moskvada keçirilən enerji və investisiya əməkdaşlığı üzrə Rusiya-Çin Hökumətlərarası Komissiyasının iclaslarında bildirilib. İclaslara Rusiya tərəfdən baş nazirin müavini Denis Manturov, Çin tərəfdən isə baş nazirin müavini Dinq Syuesyan rəhbərlik edib.
İclasda çıxış edən Zhang Çinin ilin ilk yarısında Rusiyadan neft idxalını 4,8 faiz artırdığını bildirib. Eyni dövrdə təbii qaz idxalı 22,5 faiz artıb. Çin iyunda Rusiyadan boru kəmərləri ilə 737 milyon dollarlıq təbii qaz alıb. Bu, iki ölkə arasında ikitərəfli ticarətdə yeni zirvəyə çatdığını göstərir. İlin ilk altı ayında Rusiyanın Çinə təbii qaz nəqli 17,4 faiz artaraq təxminən 4 milyard dollara çatıb. Bu, son beş ildə 13 dəfə artım deməkdir.
Çin baş nazirinin müavini Dinq Syuesyan Rusiya ilə investisiya əməkdaşlığını inkişaf etdirməyə hazır olduqlarını bəyan edib. Dinq iki dövlət başçısının əldə etdiyi mühüm razılaşmanı həyata keçirmək, iki ölkə arasında investisiya əməkdaşlığının səviyyəsini davamlı olaraq yüksəltmək və qarşılıqlı faydalı ümumi inkişafı həyata keçirmək istədiklərini bildirib.
Dinq investisiya planlaşdırmasının gücləndirilməsini, birgə layihələrin ən qısa və effektiv həyata keçirilməsini təşviq etmək üçün əməkdaşlığın və koordinasiyanın gücləndirilməsini, daha səmərəli regional əməkdaşlığın həyata keçirilməsi üçün investisiya əməkdaşlığı potensialının müəyyən edilməsini, siyasət dəstəyinin gücləndirilməsini və keyfiyyətli investisiya mühitinin yaradılmasını təklif edib.
