İş dünyası son vaxtlar Rusiya ilə Çin arasında ticarətdə qarşılaşılan ciddi çətinlikləri aradan qaldırmaq üçün yeni yollar axtarır.
Hafta.az-ın “İzvestiya”ya istinadən yazdığına görə, xüsusilə logistika və maliyyə əməliyyatları iki ölkə arasında ticarətin davam etdirilməsinə böyük maneələr yaradır. Xəbərə görə, Çin tədarükçüləri son vaxtlar Rusiyaya malların daşınmasının üçüncü ölkələr vasitəsilə həyata keçirilməsini tələb etməyə başlayıblar. Bu tələblər Qərbin davam edən sanksiyalarının nəticəsi kimi qiymətləndirilir.
İyulun ortalarından etibarən Çin tədarükçülərindən malları birbaşa Rusiyaya göndərmək əvəzinə üçüncü ölkələr vasitəsilə mal göndərmək tələbləri artıb. Bu, xüsusilə elektron məhsullar kimi sanksiya siyahılarında olan mallara aiddir.
Rusiya iş dünyası çətinlikləri aradan qaldırmaq üçün alternativ yollar axtarmağa davam edir. Bəzi logistika şirkətləri İran kimi ölkələr vasitəsilə yeni ticarət yolları yaratmaq üçün çalışırlar.
Rusiya Elmlər Akademiyasının Çin və Müasir Asiya İnstitutunun direktor müavini Pavel Kuznetsov bəyan edib ki, üçüncü ölkələr vasitəsilə Rusiyaya malların tədarükü üçün əsas logistika qaydaları 2022-ci ildə hazırlanıb. Rusiyalı ekspertin fikrincə, bu qaydaların effektivliyini Qırğızıstandan idxalın 3 dəfə, Qazaxıstandan isə 1,5 dəfə artması göstərir. Bundan başqa, Cənub-Şərqi Asiya, Türkiyə və Körfəz ölkələri də bu prosesdə iştirak edir.
Lakin bu yeni marşrutlar hələ tam qurulmayıb və logistika proseslərində müxtəlif çətinliklər var. Bundan əlavə, ekspertlərin fikrincə, bu alternativ yollardan istifadə malların qiymətinin artmasına və buna görə də idxalın həcminin azalmasına səbəb ola bilər.
Qəzet yazır ki, Rusiya ilə Çin arasında ticarətin gələcəyi qeyri-müəyyən olaraq qalır. Müvafiq olaraq, yeni ödəniş və logistika kanallarının axtarışları davam edərkən, mövcud vəziyyətin davamlılığı ilə bağlı ciddi sual işarələri var.
