Əfqanıstanda bərpa olunmuş Naibabad dəmir yolu stansiyasının təntənəli açılış mərasimi keçirilib. Bu barədə “Özbəkistan Dəmir Yolları” QSC məlumat yayıb.
Hafta.az-ın yazdığına görə, bərpa işləri “Özbəkistan Dəmir Yolları” Səhmdar Cəmiyyəti tərəfindən Termiz regional dəmir yolu qovşağı və Soqdiana Trans ilə əməkdaşlıq çərçivəsində, “Özbəkistan Dəmir Yolları” ilə Əfqanıstan Dəmir Yolu İdarəsi arasında həyata keçirilib.
Açılış mərasimində ilk yük vaqonları Naibabad stansiyasına gəlib ki, bu da rayonun nəqliyyat infrastrukturunun inkişafında yeni mərhələnin başlanğıcını göstərir.
Dənizə çıxışı olmayan ölkə öz ərazisindən keçən avtomobil və dəmir yolu marşrutları vasitəsilə Mərkəzi Asiyanı Cənubi Asiya ilə birləşdirməkdə mühüm rol oynayır. Bu baxımdan, Özbəkistan dəmir yolu mütəxəssisləri tərəfindən bərpa edilən Naibabad stansiyası Rusiya, Qazaxıstan, Çin və Avropa ölkələrindən Əfqanıstandan keçməklə Pakistan, Hindistan və digər Cənubi Asiya ölkələrinə yüklərin daşınması üçün mühüm mərkəz olacaq.
Məzari Şərif-Kabil-Xarlaçi marşrutu üzrə TransƏfqan dəmir yolu tikintisi layihəsinin icrasının sürətləndirilməsinə xüsusi diqqət yetirilib. Bu layihə regionda logistika əlaqələrini əhəmiyyətli dərəcədə yaxşılaşdırmağa və ticarət-iqtisadi əməkdaşlıq üçün yeni imkanlar yaratmağa vəd edir.
Əfqanıstan tərəfi 75 kilometr uzunluğunda dəmir yolu xəttinin və Naibabad stansiyasının təmir-bərpa işlərinə görə özbəkistanlı həmkarlarına təşəkkür edib. Hər iki tərəf bütün iştirakçılar üçün qarşılıqlı faydalı olacaq əməkdaşlığın davam etdirilməsində maraqlı olduqlarını bildirdilər.
