ABŞ Mərkəzi Kəşfiyyat İdarəsi (MKİ) İrandakı potensial məlumat mənbələrinə çatmaq üçün təhlükəsiz ünsiyyət üsullarını izah edən fars dilində bir mesaj yayımlayıb. Sosial media platformaları X, Instagram və YouTube-da paylaşılan mesajda İranda MKİ ilə təhlükəsiz şəkildə necə əlaqə saxlamaq barədə təkliflər verilib. Paylaşım tezliklə milyonlarla baxış toplayıb.
Hafta.az yazır ki, mesajda VPN-lərdən istifadə, şəxsiyyəti müəyyən etməyi çətinləşdirən cihazlara üstünlük vermək, şəxsi internet brauzerlərindən yararlanmaq və internet tarixçəsini silmək kimi təhlükəsizlik tədbirləri yer alır.
MKİ həmçinin istifadəçilərin agentliyə rəsmi veb saytı və ya şəxsiyyəti gizlətmək üçün xüsusi vasitələrdən istifadə etməklə daxil ola biləcək "qaranlıq şəbəkə" vasitəsilə əlaqə saxlaya biləcəklərini bildirib. Bu açıqlama ABŞ ilə İran arasında gərginliyin və Vaşinqtonun Yaxın Şərqdə hərbi iştirakının əhəmiyyətli dərəcədə artdığı bir vaxtda gəlir. ABŞ prezidenti Donald Tramp son aylarda İrana qarşı hərbi variantların masada olduğunu və nüvə proqramı ilə bağlı yeni danışıqların planlaşdırıldığını bildirib.
Bu arada, İranda rejim əleyhinə etirazlar son vaxtlar yenidən alovlanıb və bildirilir ki, bu həftənin əvvəlində Tehrandakı bəzi universitetlərdə tələbə nümayişləri keçirilib.
MKİ əvvəllər oxşar məzmunu rus, çin, koreya və digər dillərdə paylaşıb. Agentlik rəsmiləri bu tip kampaniyaların hədəf ölkələrdə cəlbedici və effektiv olduğunu bildirirlər.
İranın BMT-dəki Daimi Nümayəndəliyi hələlik məsələ ilə bağlı rəsmi açıqlama verməyib.
-1780681336.jpg&h=173&w=263&zc=1&q=80)
