Ordusunu modernləşdirmək üçün ABŞ-dan dəstək almağa qərar verən Ekvadorla mübahisəsindən sonra Rusiya Hindistandan banan idxal etməyə başlayıb.
Hafta.az-ın yazdığına görə, Ekvador 200 milyon dollar dəyərində qabaqcıl ABŞ silahları müqabilində "Ukrayna və Rusiyanın metal qırıntıları" adlandırdığı Sovet dövründən qalma köhnəlmiş hərbi texnikasını ABŞ-a göndərmək barədə razılığa gəlmişdi.
ABŞ bəyan edir ki, Ekvadordan alacağı silahlar müharibədən zərər çəkmiş ölkəyə döyüş meydanında Rusiyanın işğalı ilə mübarizədə dəstək olmaq üçün Ukraynaya göndəriləcək.
Müqavilə Rusiya rəsmilərini qəzəbləndirsə də, Kreml bunu “müqavilənin ehtiyatsız pozulması” adlandırıb və Moskva buna cavab olaraq Ekvadorun 5 ən böyük meyvə tədarükçüsündən banan idxalını dayandırıb.
Xatırladaq ki, 2022-ci ildə təxminən 3,5 milyard dollarlıq satışla Ekvador dünyanın aparıcı banan ixracatçısıdır. İllik satışlarının təxminən beşdə biri Rusiyaya gedir.
Hindistanın artıq müdaxilə etməyə və bu mübahisədən faydalanmağa hazır olduğu anlaşılsa da, bu, Ukrayna müharibəsinə baxmayaraq Yeni Dehlinin Moskva ilə ticarətini gücləndirməsinin son nümunəsidir. Avropa İttifaqı və digər Qərb ölkələri Rusiya ilə ticarətə məhdudiyyətlər tətbiq etdikdən sonra Hindistan artıq külli miqdarda endirimli Rusiya nefti alıb.
Rusiyanın qida təhlükəsizliyinə nəzarət agentliyi “Rosselxoznadzor” bildirib ki, Hindistandan bananların ilk partiyası yanvarda göndərilib. Hindistan bananlarının növbəti partiyasının fevralın sonunda Rusiyaya çatacağını bildirən qurum “Hindistan bananlarının Rusiya bazarına ixrac həcminin artacağını” bildirib.
“Rosselxoznadzor” bəyan edib ki, əsas banan istehsalçısı olan Hindistan Rusiya bazarına manqo, ananas, papaya və quava kimi digər meyvələri də tədarük etmək istəyir.
“The Independent”in təhlil etdiyi Kpler bazar məlumatlarına görə Hindistan keçən il gündə orta hesabla 1,75 milyon barel neft idxal edərək, 2022-ci illə müqayisədə 140 faiz artımla Rusiya xam neftinin dünyanın əsas idxalçısına çevrilib.
