Rusiyada son günlər sosial şəbəkələrdə yayılan və qanlı öskürəyə səbəb olan yeni virusun ortaya çıxması ilə bağlı iddialar səlahiyyətlilər tərəfindən təkzib edilib.
Hafta.az-ın yazdığına görə, “Rospotrebnadzor” İctimai Səhiyyə Agentliyi RBK-ya açıqlamasında ölkədə aparılan davamlı epidemioloji monitorinq və genetik nəzarət çərçivəsində “heç bir yeni virus və ya ciddi mutasiyaları olan patogen aşkar olunmadığını” bildirib.
Müəssisə bu barədə tibb professoru və virusoloq Viktor Zuyevin naməlum etiologiyalı yeni tənəffüs xəstəliyinin yayılması ilə bağlı açıqlamalarından sonra açıqlama verib.
“Rospotrebnadzor” bildirib ki, tənəffüs yoluxucu infeksiyalar, qrip, Covid-19 və cəmiyyətdən qaynaqlanan pnevmoniya halları hazırkı səviyyədə nəzarət altındadır və ümumilikdə yoluxmaların sayında azalma müşahidə olunur. Bununla belə, qeyd olunub ki, qrip virusları, xüsusilə B və A (H1N1) tipli ştamlar hələ də aktiv dövriyyədədir. Qurum ictimaiyyəti narahat edən iddialardan sonra lazımi nəzarətlərin davam etdiyini də vurğulayıb.
Qanlı öskürək iddiaları ilk dəfə SHOT Telegram kanalında səsləndirilib və bəzi xəstələrdə bu simptomların yüksək hərarət, həddindən artıq zəiflik və onları yatağa salacaq qədər ağır vəziyyətlə müşayiət olunduğu iddia edilib. Lakin keçmiş baş səhiyyə rəsmisi və Rusiya Elmlər Akademiyasının üzvü Gennadi Onişenko belə simptomların şəxsi sağlamlıq vəziyyəti və ya digər xəstəliklərin ağırlaşması ilə bağlı ola biləcəyini söyləyib. Tədqiqat institutlarından alınan məlumatlarda yeni virusun izinə rast gəlinmədiyini deyən Onişenko çaxnaşmaya səbəb olacaq bir vəziyyətin olmadığını bildirib.
