Səudiyyə Ərəbistanının hava hücumundan müdafiə qüvvələri çərşənbə günü bir dronu və iki qanadlı raketi havada zərərsizləşdiriblər.
Hafta.az yazır ki, Krallığın Müdafiə Nazirliyinin rəsmi sözçüsü general-mayor Turki əl-Malikinin sözlərinə görə, hava hücumundan müdafiə qüvvələri Şərq əyalətində bir dronu və Əl-Xərc üzərindəki iki qanadlı raketi ələ keçirərək məhv edib.
Başqa bir açıqlamada Energetika Nazirliyindəki mənbə bildirib ki, səhər saatlarında Ras Tanura neft emalı zavoduna edilən dron hücumunun qarşısı alınıb. Mənbə hadisənin heç bir ziyana səbəb olmadığını və neft tədarükünə təsir etmədiyini təsdiqləyib.
Səlahiyyətlilər bildiriblər ki, Krallığın hava hücumundan müdafiə qüvvələri təhdidlərə dərhal reaksiya verib, hava hədəflərini uğurla məhv edərək həyati əhəmiyyətli obyektlərin və infrastrukturun təhlükəsizliyini qoruyub.
Şərq əyalətində yerləşən Ras Tanura, Səudiyyə Ərəbistanının ən böyük neft emalı və ixrac müəssisələrindəndir.
