TAPI layihəsi (Türkmənistan, Əfqanıstan, Pakistan, Hindistan təbii qaz kəməri) üzərində iş 2018-ci ildə Heratda Əfqanıstan, Türkmənistan, Pakistan və Hindistanın yüksək səviyyəli rəsmiləri tərəfindən başlansa da, sonradan qeyri-müəyyən səbəblərdən layihə dayandırılıb.
Hafta.az-ın yazdığına görə, Əfqanıstanın xarici işlər naziri Əmirhan Müttəki nazirlikdə keçirilən iclasda yaxın vaxtlarda TAPI layihəsi üzərində işlərə başlanılacağını açıqlayıb. Müttəki deyib ki, TAPI layihəsi işə düşəndə Əfqanıstanın rüsumlardan hər il təxminən 450 milyon dollar gəlir əldə edəcəyi və 5 milyard kubmetr qazdan istifadə edəcəyi gözlənilir.
Müttəki Türkmənistanın Əfqanıstanın mühüm iqtisadi tərəfdaşlarından biri olduğunu da vurğulayaraq, bu ölkə ilə əməkdaşlıq çərçivəsində TAPI, TAP, CASA-1000 və dəmir yolu kimi bir çox mühüm layihələrin fəal şəkildə davam etdirildiyini bildirib.
“Bu layihənin başlanması üçün bütün hazırlıqlar görülüb və hər iki ölkə işə başlamağa hazırdır. İki ölkə arasında hüquqi sənədlərin imzalanması gözlənilir", - Müttəki deyib.
TAPI layihəsi nədir?
TAPI layihəsi 1840 kilometr məsafəni əhatə edir ki, bunun 214 kilometri Türkmənistanda tamamlanıb. Qalan işlər tezliklə Əfqanıstanda başlayacaq. Türkmənistan bu kəmərlə 33 milyard kubmetr qaz ixrac edəcək. O cümlədən, Əfqanıstana 5 milyard kubmetr, Pakistana 14 milyard kubmetr və Hindistana 14 milyard kubmetr təbii qaz nəql olunacaq.
Layihənin ümumi dəyərinin 10 milyard dollar olduğu təxmin edilir.
Müttəki vurğulayıb ki, TAPI layihəsinin həyata keçirilməsi müvafiq ölkələrin, o cümlədən Əfqanıstan, Türkmənistan, Pakistan və Hindistanın böyümə və inkişafında mühüm rol oynayacaq.
Əfqanıstan Sənaye və Mədən Palatasının prezidenti Şerbaz Kaminzadə isə layihə ilə bağlı bunları deyib: “TAPI layihəsinin başa çatdırılması Pakistan, Hindistan, Əfqanıstan və Türkmənistanın iqtisadiyyatlarını dəyişdirəcək, çünki əhəmiyyətli miqdarda enerji Orta Asiyadan Cənubi Asiyaya nəql olunacaq”.
TAPI layihəsi üzərində iş 2018-ci ildə Heratda Əfqanıstan, Türkmənistan, Pakistan və Hindistanın yüksək səviyyəli rəsmiləri tərəfindən başlansa da, sonradan qeyri-müəyyən səbəblərdən dayandırılıb.
