Özbəkistan prezidenti Şavkat Mirziyoyev Düşənbədə keçirilən ikinci Mərkəzi Asiya - Rusiya Sammitində deyib ki, Rusiya Özbəkistan üçün əsas, prioritet strateji tərəfdaş və müttəfiq olub, var və həmişə də olacaq.
Hafta.az-ın yazdığına görə, prezident deyib: “Belə əməkdaşlığın möhkəm, sarsılmaz təməli bizim ortaq tariximiz, çoxəsrlik əlaqələrimiz, xalqlarımızın mədəni və mənəvi yaxınlığı, ölkələrimiz arasında dostluq və etimada əsaslanan münasibətlərdir”.
Dövlət başçısı Rusiya prezidenti Vladimir Putinə “Mərkəzi Asiya ilə tammiqyaslı strateji tərəfdaşlığın inkişafına sadiqliyinə görə” səmimi minnətdarlığını bildirib.
“Özbəkistan regionla müttəfiqlik münasibətlərinin və çoxşaxəli əməkdaşlığın möhkəmləndirilməsinə verdiyiniz dəstəyi və şəxsi diqqətinizi həmişə yüksək qiymətləndirir. Təbii tərəfdaşlar olan ölkələrimiz arasında qarşılıqlı fəaliyyətə yeni impuls daxil etmək məqsədilə irəli sürdüyünüz təşəbbüsləri tam dəstəkləyirəm”, - Şavkat Mirziyoyev bildirib.
Cənab Mirziyoyev deyib ki, qlobal iqtisadiyyatda artan geosiyasi gərginlik və böhranlar, yeni çağırışlar və təhdidlərlə yanaşı, regionda sabitliyin təmin edilməsi üçün Mərkəzi Asiya-Rusiya formatında daha sıx koordinasiya və əməkdaşlıq tələb edir.
Şavkat Mirziyoyev xüsusilə sistemli siyasi dialoqun gücləndirilməsinin və bu formatda əməli əməkdaşlığın genişləndirilməsinin vacibliyini qeyd edərək, “konkret nəticələrin əldə olunmasına diqqət yetirib”. Prezident illik zirvə görüşlərinin keçirilməsini, hökumətlər, nazirliklər, idarələr və regionlar arasında mütəmadi təmasların aparılmasını, tapşırıqların icrasına nəzarət etmək üçün hökumət başçılarının müavinləri səviyyəsində əlaqələndirmə şurasının yaradılmasını dəstəkləyib.
“Davamlı olaraq əlverişsiz bazar şəraitinə və artan xarici təsirə baxmayaraq, biz qarşılıqlı ticarət göstəricilərində müsbət dinamikanı təmin edə bilmişik. Beləliklə, ötən ilin və bu ilin yekunlarına əsasən, Özbəkistanın Rusiya və region ölkələri ilə ticarət dövriyyəsi 15 faizə yüksəlib”, - Şavkat Mirziyoyev bildirib.
“Özbəkistan digər prioritet sahəni dayanıqlı istehsal zəncirlərinin qurulması və sənaye əməkdaşlığının dərinləşdirilməsi kimi görür. Hazırda Özbəkistan qaz-kimya sənayesi və müasir mis zənginləşdirmə mərkəzinin yaradılması sahəsində Rusiya şirkətləri ilə sənaye tərəfdaşlığını fəal şəkildə inkişaf etdirir. Maşınqayırma, dəqiq cihazqayırma, kimya, elektrik, mədənçıxarma və digər sənaye sahələrində klaster əsasında əməkdaşlığın genişləndirilməsi üçün böyük potensial var” deyən Şavkat Mirziyoyev, “aparıcı müəssisələrlə özəl sektor arasında innovasiya yönümlü əməkdaşlığı stimullaşdırmaq üçün” Buxarada “Mərkəzi Asiya-Rusiya” Sənaye Mühəndisliyi Qovşağının yaradılmasını təklif edib.
Şavkat Mirziyoyev regional təhlükəsizliyin təmin edilməsi məsələsinə də toxunub. “Fikrimcə, terrorizm, ekstremizm, radikalizm, mütəşəkkil cinayətkarlıq, insan alveri və narkotiklərin qanunsuz dövriyyəsi ilə mübarizədə kəşfiyyat orqanları ilə hüquq-mühafizə orqanları arasında sıx əməkdaşlığın daha da gücləndirilməsi vacibdir. Biz yeni kibertəhlükələrə və çağırışlara qarşı birgə mübarizə tədbirlərinin hazırlanmasını təklif edirik”, - o deyib.
Əməkdaşlığın inkişaf etdirilməsi və Əfqanıstanın sosial-iqtisadi inkişafının təşviqi üçün yanaşmaların əlaqələndirilməsi üçün Özbəkistan yüksək səviyyəli məsləhətləşmələrin keçirilməsini nəzərdən keçirməyi təklif edir.
“Bu görüşlərin gündəliyinə təhlükəsizlik sahəsində əməkdaşlıq və bu ölkənin sabitliyinin və inkişafının təmin edilməsinə yönəlmiş iqtisadi layihələrin həyata keçirilməsi məsələləri daxil edilə bilər”, - Şavkat Mirziyoyev qeyd edib.
