İtaliyada zadəganlara aid olduğu güman edilən 2700 illik məzar tapılıb.
Hafta.az-ın “Popular Mechanics”a istinadən yazdığına görə, Boloniya Universitetinin tədqiqatçıları təxminən 6 ildir ki, İtaliyanın Korinaldo şəhərində arxeoloji tədqiqatlar aparırlar.
ArcheoNevola adlı layihə çərçivəsində 2018-ci ildə bölgədə Piceni şahzadəsinə aid olduğu düşünülən məzar aşkarlanıb. Eramızdan əvvəl 7-ci əsrə aid olan bu türbə böyük həyəcana səbəb olub.
Piceni xalqı eramızdan əvvəl 9-cu əsrdən eramızdan əvvəl 3-cü əsrə qədər indiki Marçe və Abruzzo arasında yaşamışdır. Qədim Roma sivilizasiyası sonralar bu bölgəni öz hakimiyyəti altına aldı.
Korinaldo Bələdiyyəsinin iyulun 27-də verdiyi açıqlamada bölgədə eramızdan əvvəl 7-ci əsrə aid yeni xəzinələrin aşkar edildiyi bildirilib. Açıqlamada bildirilib ki, yeni tapıntılar əvvəlkiləri üstələyir.
Piceni xalqından olan nəcib bir insana aid olduğu düşünülən təxminən 2700 illik məzardan 150-dən çox tarixi əsər çıxarılıb.
Bunların arasında ən maraqlısı iki təkərli araba idi. Məzarda əsilzadənin qalıqları ilə yanaşı, "bir sıra görkəmli tunc əşyalar", dəbilqə, qazan və nəfis şəkildə bəzədilmiş qablar da tapılıb.
Arxeoloqlar ət doğramaq üçün istifadə edilən dəmir balta, yemək və içki üçün nəzərdə tutulmuş dulusçuluq kimi əşyaların olduğu türbəni ziyafət mühiti ilə əlaqələndirirlər.
Açıqlamada bildirilir ki, tapıntılar məzarda yatan şəxsin cəmiyyətin “ən yüksək rütbəsi”nə aid olduğunu göstərir. Bundan əlavə, İtaliyanın müxtəlif bölgələrində son dövrlərdə yaşamış etrusklara aid əşyalar da tapılıb. İki xalqın bir-biri ilə qarşılıqlı əlaqədə olduğu və ticarət etdiyi ehtimal edilirdi.
Korinaldo meri Gianni Aloisi verdiyi açıqlamada, "Korinaldo Şahzadələr ölkəsi adı ilə fəxr edə bilər" deyib: “Nevola arxeoloji sahəsinin tarixi və mədəni dəyərini təsdiqləyən bu kəşf bizə cəmiyyətimizin tarixini öyrənməyə və bəlkə də yenidən yazmağa imkan verəcək”.
