İraqın baş naziri Məhəmməd Şia əl-Sudani Ankaranın Dəclə çayında su sərfini artırmağa razılıq verməsindən sonra Türkiyə hökumətini Fəratdan da su payını artırmağa çağırıb. Mesopotamiya artıq su qıtlığından əziyyət çəkir, yay aylarında temperatur rekord həddə çatır.
Hafta.az-ın yazdığına görə, İraq baş nazirliyindən verilən açıqlamaya görə, Sudani Türkiyənin xarici işlər naziri Hakan Fidanı qəbul edərkən Türkiyənin Dəclə çayından suyun buraxılmasını artırmaq cəhdini təqdir edib, Türkiyəni Fəratdan da suyun buraxılmasını artırmağa çağırıb.
Hakan Fidan iraqlı həmkarı Fuad Hüseynlə su məsələləri üzrə daimi birgə komitənin yaradılması barədə razılığa gəldiyini bildirib. Fidan, Bağdada gəlişinin ertəsi günü İraqın xarici işlər naziri Fuad Hüseynlə keçirdiyi birgə mətbuat konfransında, “Türkiyə hökuməti İraqdakı su qıtlığını yaxından izləyir. Biz məsələyə humanitar nöqteyi-nəzərdən baxırıq. Danışıqlarda su məsələləri üzrə daimi birgə komitənin yaradılması barədə razılıq əldə olunub” deyib.
Ölkəsinin Türkiyə ilə bütün ikitərəfli məsələlərin "əməkdaşlıq və mehriban qonşuluq ruhunda" həllində ciddiliyini vurğulayan Sudani iki ölkə arasında perspektiv imkanlardan danışıb. Sudani ölkəsinin "heç bir partiya və ya təşkilat heç bir ad altında təhlükəsizliyi pozmasına və ya İraq ərazisindən qonşu ölkələrə hücum etmək üçün platforma kimi istifadə etməsinə icazə verməyəcək" sözünü təkrarlayıb.
