İsveç Ukraynaya 13,3 milyard kron (1,25 milyard dollar) dəyərində hərbi yardım edəcək.
Hafta.az-ın yazdığına görə, bu yardım paketinə hava hücumundan müdafiə sistemləri, artilleriya mərmiləri, zirehli maşınlar və iki Saab 340 AEW&C (Havadan Erkən Xəbərdarlıq və Nəzarət) təyyarələri daxildir. Bu, Stokholmdan Kiyevə göndərilən ən böyük dəstək paketi kimi seçilir.
İsveç baş nazirinin müavini Ebba Buş bildirib ki, bu yardım paketi Ukraynanın prioritet ehtiyaclarını ödəyəcək avadanlıqlardan ibarətdir.
İsveçin müdafiə naziri Paul Conson Ukraynanın diqqətini F-16 döyüş təyyarəsi proqramına yönəltdiyini, buna görə də İsveçin JAS 39 Gripen döyüş təyyarələrini göndərmədiyini təsdiqləyib.
Conson bildirib ki, Saab 340 AEW&C təyyarələri F-16-ların tədarükünü tamamlayıb gücləndirməklə Ukrayna hava müdafiəsinə böyük təsir göstərəcək.
Saab 340 AEW&C İsveçin havadan erkən xəbərdarlıq və nəzarət təyyarəsidir. 2011-ci ildə İsveç Hərbi Hava Qüvvələrində altı belə təyyarənin olduğu bildirilir. 2023-cü ildə bu təyyarələrin S100D modifikasiyasında istifadəyə veriləcəyi bildirilir. Saab 340 AEW&C təyyarələri Tailand, Polşa, Yunanıstan və Birləşmiş Ərəb Əmirliklərinin də xidmətdədir.
Ukraynaya ayrılan bu yardım paketi ilə İsveç hökuməti müharibə zamanı Kiyevə verdiyi ən böyük hərbi dəstəyi təmin edir. Yardım paketinə zenit raketləri, sursatlar və Pansarbandvagn tırtıllı zirehli personal daşıyıcıları kimi standart və qeyri-standart avadanlıqlar daxildir. Ən diqqətəlayiq avadanlıqlardan biri uzun mənzilli radar kəşfiyyat təyyarəsi ASC 890 və ya Saab 340B-dir.
Saab 340B-nin radar sistemi 400 kilometrə qədər təsirli məsafəyə malikdir və bəzi şərtlərdə bu məsafəni keçə bilər. Bu xüsusiyyət Ukraynanın sərhəd bölgəsində raket, dron və təyyarələri aşkarlamasını asanlaşdıracaq və Ukraynanın hava hücumundan müdafiə imkanlarını əhəmiyyətli dərəcədə artıracaq. F-16 döyüş təyyarələrinin təhvil verilməsindən sonra bu təyyarələr hava hücumundan müdafiə və rabitə dəstəyi sahəsindəki imkanları tamamlayacaq.
İsveç hökuməti Saab 340B təyyarələrini ən son GlobalEye AWACS təyyarəsi ilə əvəz etməyi planlaşdırır. Bununla belə, bu cür qabaqcıl sistemlərin istismarının mürəkkəbliyi səbəbindən təlim müddəti daha uzun ola bilər. Ona görə də transfer ya daha sonra baş tutacaq, ya da ekipajın hazırlığına çoxdan başlanılmış ola bilər. İsveç pilotlarının muzdlu əsgər adı altında fəaliyyət göstərməsi də mümkündür.
Saab 340B-nin radar sistemi iki 120 dərəcə sektorda işləyir və onun kor sahələri quyruq və burun hissələridir. Lakin bu təyyarələr Ukraynanın müəyyən bölgələrindən havaya qalxaraq bütün istiqamətləri əhatə edə və geniş hava məkanına nəzarət edə bilir.
Bu yardım paketi Ukraynanın müdafiə qabiliyyətini gücləndirəcək və Rusiyaya qarşı müqavimətini artıracaq. İsveçin bu addımı Qərbin Ukraynaya dəstəyinin göstəricisi kimi qiymətləndirilir.
