Rublun məzənnəsinin düşməsi bəzi Çin ixracatçılarını Rusiyada onlayn satış platformalarında fəaliyyətlərini müvəqqəti dayandırmağa vadar edib.
Hafta.az-ın “The South China Morning Post” qəzetinə istinadən yazdığına görə, bu qərar Rusiya valyutasının devalvasiyası, valyuta məzənnəsinin dəyişməsi səbəbindən treyderlərin qazancının itirilməsi, qiymət artımı səbəbindən Rusiyada sifarişlərin azalması gözləntilərinin artması ilə bağlıdır.
"Kommersant"ın məlumatına görə, bu günə qədər təxminən 150 min çinli satıcı Ozon, Wildberries və Yandex Market kimi platformalarda fəaliyyət göstərir və bu rəqəm artmaqda davam edir.
Çinli satıcı Jordan Si artan xərclərə diqqət çəkərək, "Rublun devalvasiyası hazırda o qədər qorxuludur ki, məhsul gəlirlərinin artması və logistika xərcləri bizi çətin vəziyyətə salır. Bir çox Çinli satıcılar pul qazanmaq əvəzinə itirmək riski daşıyırlar" deyib.
Tekstil tədarük zənciri üzrə ekspert Peng Biao da risklərin artması səbəbindən bir çox satıcının "gözlə və gör" siyasətinə riayət etməyi üstün tutduğunu bildirib. "Biz Rusiya bazarından tamamilə çıxmaq istəmirik, lakin mövcud risklər bizi qərarlarımızda tərəddüd edir. Bu, əsl dilemmadır", - çinli ekspert əlavə edib.
Noyabrın 21-də ABŞ Maliyyə Nazirliyi Rusiyanın 52 maliyyə qurumuna, o cümlədən “Qazprombank”a qarşı sanksiya tətbiq edib və bundan sonra rublun dollara nisbətdə məzənnəsi 100-ü ötüb, noyabrın 29-na isə Rusiya Mərkəzi Bankının dolların rəsmi məzənnəsi 109,5782 rubl müəyyən edilib.
