Kanadanın başçılıq etdiyi ölkələr 2020-ci ildə vətəndaşlarının da olduğu Ukrayna təyyarəsinin Tehran yaxınlığında vurulması ilə bağlı İran məhkəməsi tərəfindən "təqsirli bilinən" 10 hərbçinin qeyri-şəffaf “şou-məhkəmə”ni pisləyib.
Hafta.az-ın yazdığına görə, 8 yanvar 2020-ci ildə Ukrayna Beynəlxalq Hava Yollarına məxsus PS 752 reysi Tehrandan havaya qalxdıqdan az sonra İnqilab Keşikçiləri Korpusu qüvvələri tərəfindən vurulub. Hadisə nəticəsində təyyarədə olan 176 nəfərin hamısı həlak olub. Təyyarədəki sərnişinlərin əksəriyyəti İran və Kanada vətəndaşları olsa da, müxtəlif millətlərin nümayəndələri də olub.
İran məhkəməsi bazar günü bir bölmə komandiri də daxil olmaqla 10 hərbçini təyyarəni vurmaqda günahkar bilib və müxtəlif müddətlərə həbs cəzası verib. Bununla belə, AFP-nin məlumatına görə, Kanada, İsveç, Böyük Britaniya və Ukraynanı təmsil edən koordinasiya qrupu birgə bəyanatda qeyd edib ki, müddəalar “dünyanın İranın beynəlxalq öhdəliklərini yerinə yetirməməsinə göz yummasına səbəb olmamalıdır və tehran bu hərəkətlərinə görə məsuliyyət daşıyır".
“Nə məhkəmələr, nə də bu həftə açıqlanan hökmlər qurbanların ailələrinə həqiqət və ya ədalət gətirmir, çünki İranın təyyarənin vurulması ilə bağlı qərəzli araşdırmasından başlayaraq bütün proses lazımi ədalət və şəffaflıqdan məhrumdur”, - bəyanatda bildirilib.
Bu ölkələrin verdiyi açıqlamada 176 qurbanın ailəsinin “hələ də layiq olduqları ədaləti gözlədikləri” ifadə edilərək, “Biz qəzaya uğrayan təyyarədə həlak olanların ailələrinə və yaxınlarına dəstək olmağa davam edəcəyik. Ədalət bərqərar olana qədər dincəlməyəcəyik”, - deyə bəyanatda vurğulanıb.
Xatırladaq ki, faciədən üç gün sonra İnqilab Keşikçiləri Korpusunun Raket Bölməsinin komandiri Əmir Əli Hacızadə etiraf edib ki, onun qüvvələri Kiyevə uçan təyyarəni vurublar. O, hadisənin "səhvən" baş verdiyini təkid edib və belə uydurub ki, guya təyyarənin ABŞ-ın qanadlı raketi olduğu düşünüblər.
Təyyarənin vurulmasından bir neçə saat əvvəl Tehran Qüds Qüvvələrinin komandanı general Qasım Süleymaninin öldürülməsinə cavab olaraq Ayn əl-Əsəd bazasına raket zərbəsi endirib.
İran Ədliyyəsinə bağlı "Mizan" Xəbər Agentliyi bazar günü elan edib ki, iddiada birinci dərəcəli müttəhimlərdən olan hava hücumundan müdafiə bölməsi komandiri verilən təlimatları pozduğu səbəbilə ən ağır - 10 il həbs cəzasına məhkum edilib. Agentliyinin məlumatına görə, iş üzrə mühakimə olunan digər doqquz əsgər bir ildən üç ilədək həbs cəzasına məhkum olunub.
