Türkiyə prezidenti Rəcəb Tayyib Ərdoğan Rusiya və Ukrayna liderləri arasında görüşə vasitəçilik etməyi təklif edir, lakin konkret tarixlər və yerlər hələ müzakirə edilməyib. Bu barədə RİA Novosti Ankaradakı diplomatik mənbəyə istinadən məlumat yayıb.
“Biz daima Rusiya Federasiyası və Ukrayna liderləri arasında yüksək səviyyəli danışıqlar üçün platforma və lazım olan hər şeyi təqdim etməyə hazır olduğumuzu bəyan edirik. Prezident bunu hər iki liderlə danışıqlarda daim bəyan edir, lakin hələlik konkret tarixlər və yerlər barədə söhbət getmir”, - agentliyin həmsöhbəti bildirib.
Onun sözlərinə görə, Ərdoğan “daha çox itki və dağıntıların qarşısını almaq üçün” Ukraynada atəşkəsə nail olmaq üçün səylərini davam etdirmək niyyətindədir. Mənbə qeyd edib ki, Rusiya və Ukrayna tərəfləri ilə telefon danışıqları xarici siyasətin gündəliyindədir.
“Hörmətli cənab Ərdoğan yeganə liderdir ki, bitərəfliyini qoruyub saxlamaqla hər iki tərəflə əlaqə saxlaya bilir. Münaqişə prezidentin xarici siyasət gündəliyindədir”.
Diplomat qeyd edib ki, Ankara Rusiya və Ukrayna prezidentləri Vladimir Putin və Vladimir Zelenski ilə əlaqə saxlamağa davam edəcək.
