Azərbaycanın keçmiş baş naziri Surət Hüseynov vəfat edib. Moskvadan İstanbula gələn Surət Hüseynov təyyarə eniş edən zaman ürəktutmadan vəfat edib. Qeyd edək ki, Gəncədə anadan olan 64 yaşlı Surət Hüseynov Azərbaycan SSR Ali Sovetinin XII çağırış deputatı (1989–1991), Baş nazirin müavini (1993) vəzifələrində olub. Silahlı dəstələr yaratmaqla hakimiyyəti ələ keçirməyə cəhd edən S.Hüseynov 1994-cü il oktyabrın 6-da Milli Məclis üzvlüyündən, oktyabrın 7-də isə baş nazir vəzifəsindən uzaqlaşdırılıb. Surət Hüseynov 1999-cu ilin fevral ayında məhkəmənin qərarı ilə ömürlük həbs cəzasına məhkum edilib. 2004-cü il martın 17-də Prezident İlham Əliyevin Əfv Fərmanı ilə həbsdən azad olunub.
Həftənin KÜRƏKƏNİ
Çeçenistan rəhbəri Ramzan Kadırov kürəkəni Visxan Matsuyevi yüksək vəzifəyə təyin edib. V. Matsuyev Baş nazirin müavini və kənd təsərrüfatı naziri vəzifələrinə təyinat alıb. O, R. Kadırovun qızı, mədəniyyət naziri Ayşat Kadırova ilə evlidir.
Həftənin ETİRAZI
Rusiyadan “Astoria Grande” adlı kruiz gəmisinin Gürcüstanın Batumi limanına gəlməsi yenidən etirazla qarşılanıb. Ölkənin Daxili İşlər Nazirliyi gəminin limana gəlməsinə etiraz edən 10-a yaxın şəxsi saxlayıb. Qeyd edək ki, bu, “Astoria Grande” gəmisinin Gürcüstana səfərinə qarşı ilk etiraz deyil. Belə ki, iyulun 27-si yüzdən çox Gürcüstan vətəndaşı gəminin Batumi limanına gəlməsinə qarşı etiraz aksiyası keçirib.
Həftənin REKORDU
Azərbaycanın qadın atleti Lamiyə Vəliyeva Çinin Çendu şəhərində keçirilən 31-ci Ümumdünya Yay Universiadasında yarımfinala yüksəlib. İdmançımız 400 metr məsafəni 55.48 saniyəyə qət edib. Vəliyeva bununla həm böyüklər, həm də 23 yaşadək qadınlar arasında Azərbaycan rekordunu da yeniləyib. Fəxriyyə Tağızadə isə uzunluğa tullanma üzrə yarışda 5.78 metr nəticə ilə mübarizəni təsnifat mərhələsində dayandırıb.
Həftənin VARLISI
Türkiyənin məşhur “Kurtlar Vadisi” serialında Polat Alemdar obrazını canlandıran Necati Şaşmazın sərvəti məlum olub. Onun 18 evinin olduğu bildirilib. Orta hesabla isə 1 evinin dəyəri 2 milyon 600 min dollardır. Aktyor həmçinin qardaşı Naci Şaşmaz ilə birlikdə Gerede rayonunda fermaya sahibdir. N. Şaşmaz davamlı olaraq bu sahəyə investisiya edir. Bundan əvvəl isə o, sözügedən rayonda ağac fabriki açmışdı.
Həftənin QADAĞASI
Səudiyyə Ərəbistanı, Küveyt, Qətər və Birləşmiş Ərəb Əmirlikləri ABŞ istehsalı olan “Barbie” filminin izlənilməsini qadağan edib. Buna səbəb filmdə olan bəzi səhnə və ideaların həmin ölkənin dəyərləri ilə üst-üstə düşməməsidir. Bildirilib ki, filmdə öpüşən iki qadın personajın təsviri müsəlman cəmiyyətlərin gözləntiləri ilə toqquşub. Həmçinin, Yaxın Şərqdəki dini inanclar da “Barbie” filminin qadağan edilməsində rol oynayıb.
