ABŞ-da universitetlərdə yayılan "Qəzzəyə dəstək" nümayişlərinə qatılan 88 yaşlı amerikalı yəhudi Marion İnqram İsrailə etiraz edən tələbələri "qəhrəman" kimi xarakterizə edərək, "Mən Holokostdan sağ qalmışam və buradayam. Qəzzadakı qırğına etiraz etmək üçün Amerikadan İsrailin bu qırğınını maliyyələşdirməsini dayandırmasını istəyirəm. İsrailin qonşularını bombalamasını tələb edirəm” deyib.
Hafta.az-ın yazdığına görə, ABŞ-da ölkə daxilində kampuslara yayılan “Qəzzəyə dəstək, İsrailə reaksiya” nümayişləri paytaxt Vaşinqtondakı universitetlərə də sirayət edərkən, yüzlərlə tələbə Corc Vaşinqton Universitetinin bağçasına toplaşaraq nümayişlər təşkil edib.
Fələstin əsilli tələbələr, eləcə də Amerika yəhudiləri, digər etnik və dini mənsubiyyətlərdən olan tələbələrin müşayiəti ilə keçirilən nümayişlərdə Holokostdan sağ çıxmış 88 yaşlı fəal da iştirak edib.
AA müxbirinə duyğu və düşüncələrini izah edən müharibə əleyhdarı fəal Marion İnqram ən mühüm arzusunun Qəzzada dinc əhaliyə qarşı qırğına son qoymaq olduğunu bildirib.
İnqram gənc tələbələrin və universitet professorlarının şəhərcik meydanlarında bir araya gələrək etiraz aksiyaları keçirmələrini, hər şeyi riskə atmalarını çox mənalı və dəyərli hesab etdiyini deyərək, bu izdihamın öz səslərini bütün dünyaya çatdıracağını vurğulayıb.
İsrail rəhbərliyini və ona sərt sözlərlə dəstək verən ABŞ rəhbərliyini tənqid edən İnqram, "15 mini uşaq olmaqla 34 mindən çox insan öldürüldü" deyib. O, bunun özünümüdafiə olmadığını və ölən uşaqların özlərini müdafiə etməyə imkanı olmadığını bildirib.
Hər bir fələstinlinin də ən az israillilər qədər yaşamaq haqqına sahib olduğunu bildirən amerikalı fəal, "İsraillilərlə fələstinlilərin aralarında divar olmadan yaşamasını arzulayıram" deyib.
Qəzza üçün nümayiş keçirən tələbələr haqqında "Onlar qəhrəmandırlar və gözəldirlər" deyən İnqram 1960-cı illərdə müharibə əleyhinə nümayişlərdə də iştirak etdiklərini, bu hərəkətlərin siyasətçilərin atdığı addımları istiqamətləndirəcək qədər güclü olduğunu bildirib.
Amerika rəhbərliyinin bu tələbə nümayişlərini izləmək və anlamaq məcburiyyətində olduğuna diqqət çəkən İnqram, hazırda meydandakı gənclərin əksəriyyətinin noyabrda keçiriləcək prezident seçkilərində səs verəcəklərini bildirib.
