Müharibə başlayandan bəri “ac və dərmansız” olduqlarını iddia edən rus əsgərləri kameralar qarşısına keçərək Rusiya prezidenti Putinə qarşı üsyan ediblər. Sosial mediada geniş əks-səda doğuran videoda rota komandiri baş komandirin şikayətləri təxribat kimi şərh etdiyinə diqqət çəkərək, “Əsgərlərinizi ölümə göndərməkdən nə qazanılır?” sualını verib.
Hafta.az bildirir ki, fevralın 24-də Rusiyanın Ukraynaya qarşı müharibəsi 100 günü geridə qoyarkən, Ukraynaya “sülh qüvvəsi” kimi göndərilən rus əsgərləri, öz təbirincə, sonu bilinməyən münaqişəyə sürükləniblər.
Aylardır vaxtaşırı gündəmə gəlir ki, rus əsgərləri Ukraynada yaşadıqları bəlalardan şikayətlənir, əmrlərə tabe olmur, silahlarını yerə qoyurlar.
Dünya mətbuatı rus əsgərlərinin səs yazılarını dəfələrlə deşifrə edib, lakin bu dəfə əsgərlər öz istəyi ilə kamera qarşısına keçərək Rusiya prezidenti Putinə səslənib.
Telegram-da yayımlanan görüntülərdə separatçı Donetsk Xalq Respublikasının 113-cü atıcı alayından olduqlarını bildirən əsgərlər cəbhə xəttində döyüşmək üçün Ukraynaya göndərildiklərini, lakin soyuqda aylarla dərmansız və yeməksiz qaldıqlarını bildirərək üsyan ediblər.
Əsgərlərinin lazımi avadanlıq və tibbi xidmətlə təmin olunmadığını deyən rota komandiri heç bir şəkildə hərbi xidmətə çağırılmamalı olan xroniki xəstəlikləri olan kişilərin müharibənin ortasına atıldığını iddia edib.
"113-cü atıcı alayın 5-ci piyada batalyonu Ukraynanın Xerson vilayətində ön cəbhədə idi. Həmin vaxt şəxsi heyət soyuğa və aclığa qalib gəldi və biz maddi yardım, tibbi ləvazimat və yeməksiz bir müddət ərzində döyüşə bildik”, - komandir sosial mediada sürətlə yayılan videoda bildirib.
Əsgərlərin heç bir tibbi müayinədən keçmədən döyüş meydanına göndərildiyini bildirən komandir, "Bizim batalyonda elə adamlar var ki, Donetsk Xalq Cümhuriyyətinin qanunlarına görə əsgərliyə getməsinlər. Xroniki xəstəlikləri olanlar var, psixi problemləri olan insanlar var".
"Ali komandanlıq bizim şikayətlərimizi təxribat kimi yozur" deyən komandir, "zabitlərinizə hörmət edin. Əsgərlərinizi ölümə göndərməkdən nə əldə etmək olar?" sualını verir.
Komandirdən sonra narahatlıqlarını bildirən, lakin yuxarı eşelonda onlara məhəl qoyulmadığını deyən əsgərlər bir-bir danışır.
Dünya mətbuatında və sosial mediada geniş əks-səda doğuran videoçarx Donbasda şiddətli və qanlı qarşıdurmaların ortasında ortaya çıxıb, lakin videodakı bölmənin yüzlərlə kilometr aralıda, işğal olunmuş şəhərin yaxınlığında yerləşdiyi güman edilir.
Strateji əhəmiyyətli Xerson şəhəri müharibənin ilk günlərindən rus qüvvələrinin əlindədir. Lakin bu yaxınlarda şəhər yeni müqavimət dalğası ilə sarsılıb.
Ukraynapərəstlər şəhərin divarlarına və elektrik dirəklərinə Rusiya rəsmilərinə qarşı hədələr yazır. Kiçik və irimiqyaslı təxribat hücumları təşkil edilir. Binaların üzərində mavi və sarı Ukrayna bayrağı hələ də görünür.
"Bu, yerli müqavimətdir" deyən Xerson Vilayət Administrasiyasının rəhbərinin müşaviri Serhiy Xlan, "Üsyançılar Xersonun Ukraynaya məxsus olduğunu hər gün bizə xatırladırlar".
Rus əsgərlərinin bölgədə üsyana qalxmasının səbəblərindən birinin də bu müqavimət olduğu iddia edilir.
Rusiyanın Ukraynaya müdaxiləsindən az əvvəl separatçı Donetsk və Luqansk vilayətlərində ümumi səfərbərlik elan edilib.
Səfərbərlik çərçivəsində yaşı 55-dən aşağı olan bütün kişilərin ərazini tərk etməsi qadağan edilib. Müharibədə iştirak edənlərin sayı yetərli olmadığı aşkar edildikdə, Donetsk lideri Denis Puşilin yaş həddini 65-ə qaldırıb.
Bununla belə, region sakinlərinin danılmaz əksəriyyəti Ukraynanı öz vətəni hesab edir və onlara qarşı döyüşmək istəmir. Bu səbəbdən bölgədə minlərlə kişinin orduya getməmək üçün evlərinin zirzəmilərində və gizli anbarlarda gizləndiyi iddia edilir.
