“Rusiya başa düşür ki, İrandan nümunə götürərək Azərbaycana qarşı ritorikasını sərtləşdirməyə başlasa, bu, nəinki problemin həllinə gətirib çıxarmayacaq, əksinə, Rusiyanı daha da dərin çıxılmaz vəziyyətə salacaq...”
“Laçın dəhlizində Azərbaycan sərhəd-keçid məntəqəsinin yaradılmasının yeganə mesajı odur ki, Rusiya və onun ordusu təhlükəsizliyin təminatçısı ola bilməz. Əgər onlar iki il yarım əvvəl üzərinə götürdükləri öhdəliklərin yerinə yetirilməsini və Qarabağ ermənilərinin təhlükəsizliyini təmin edə bilmirlərsə, xarici təcavüz halında Ermənistan qarşısında müqavilə öhdəliyini necə təmin edə bilərlər?”
Hafta.az xəbər verir ki, bu fikirləri Ermənistanın siyasi fəallarından olan Avetis Babacanyan “Hraparak” qəzetində yazıb.
“Artıq Rusiyanın Azərbaycanı danışıqlar yolu ilə cilovlamaq üçün kifayət qədər səlahiyyəti, onu hərbi yolla cilovlamaq üçün isə gücü və imkanı yoxdur. Azərbaycan bu gün Laçın dəhlizini bağlasa, sabah Zəngəzur dəhlizini aça bilər. Belə olan halda Rusiyanın da reaksiyası eyni ola bilər. qınayan bəyanat və konkret dəstək olmayacaq. Nəticə birdir. Bu da onu göstərir ki, Ermənistanın yeni, daha etibarlı təhlükəsizlik qarantlarına ehtiyacı var” -davamında belə yazan erməni fəal hesab edir ki, Rusiya artıq Ermənistanı tərk etmək fikri ilə barışmağa başlayır.
“Rusiya Qarabağ və Ermənistanda dalana dirənib. Ukraynaya qarşı müharibə şəraitində onun Azərbaycana qarşı yeni müharibəyə başlaması qəbuledilməz lüks olardı. Sərt reaksiya verməkdənsə, Azərbaycana boyun əymək, onun təxribatçı hərəkətlərinə göz yummaq daha yaxşıdır. İran da Azərbaycana sərt reaksiyalar verməyə başladı, amma o reaksiyanın altında güc olmayanda heç nə deməmək daha yaxşıdır. Rusiya başa düşür ki, İrandan nümunə götürərək Azərbaycana qarşı ritorikasını sərtləşdirməyə başlasa, bu, nəinki problemin həllinə gətirib çıxarmayacaq, əksinə, Rusiyanı daha da dərin çıxılmaz vəziyyətə salacaq. Rusiyanın yeganə variantı bu vəziyyətdə mümkün qədər simasını saxlamaq və vaxt udmaqdır...
Bu ssenari Ermənistan hakimiyyətinin də ürəyincədir. Hər halda, Paşinyan hökuməti Rusiya ilə münasibətləri kəsmək, anti-Rusiya ictimai əhval-ruhiyyəni alovlandırmaq və son nəticədə Ermənistanı Rusiyanın mövcudluğundan azad etmək üçün hər şeyi edir. Bəzi məlumatlara görə, Paşinyan artıq öz hökumətinin iqtisadi blokunun nümayəndələrinə Ermənistanın Avrasiya İqtisadi Birliyindən çıxması və Qərbin Rusiyaya qarşı sanksiyalarına qoşulması halında onun hansı iqtisadi nəticələrlə üzləşə biləcəyini hesablamağı tapşırıb. Araşdırmalar son dərəcə pis nəticələr göstərir, lakin belə bir qərar qəbul edildikdə, mümkün nəticələr əhəmiyyətli təsir göstərməyə bilər. Paşinyan Qərbin təhlükəsizlik sisteminə qoşulmağın daha vacib olduğunu bəyan edə bilər...
Bir tərəfdən Rusiya müqavimət göstərir, Qarabağdan və Ermənistandan asanlıqla imtina etmək istəmir, digər tərəfdən, onun alternativi yoxdur... Düşünmək olar ki, indi Ermənistanda güclü rusiyapərəst hakimiyyət olsaydı, Rusiya Azərbaycana müharibə elan edər, Azərbaycan keçid məntəqəsini tanklarla darmadağın edərdi. Eynilə Ermənistanda olduğu kimi, Rusiyada da insanlar öz zəifliklərini və səhvlərini başqalarının üzərinə atmağı xoşlayırlar. Belə daha asan və təhlükəsizdir, Rusiyada öz hökumətini tənqid etmək adət deyil...
Ruslar günü-gündən daha çox əmin olurlar ki, onların Qarabağda və Ermənistanda qalmaları nəinki çətin, həm də “köhnəlmiş”dir. Onların indiyədək Ermənistana və erməni xalqına təklif etdikləri “məhsul”un – təhlükəsizliyin “müddəti bitib”. Onlar başa düşürlər ki, Ermənistan nə vaxtsa Rusiya ilə hüquqi müqavilə münasibətlərini birtərəfli qaydada poza, onları buradan getməyə məcbur edə bilər. Və onlar buna doğru da gedirlər” -deyə Avetisyan yekunda bildirir.
