ABŞ-ın Suriyanın şimal-şərqindəki kürd qüvvələrinə Avenger qısa mənzilli hava hücumundan müdafiə sistemləri (SAM) göndərməsi xəbəri Türkiyə ilə ABŞ arasında münasibətləri yenidən gərginləşdirib.
Hafta.az-ın “Nezavisimaya qazeta”ya istinadən yazdığına görə, Pentaqonun bu addımı kürd döyüşçülərin hava hücumundan müdafiə imkanlarını gücləndirmək məqsədi daşıyır və ABŞ-ın Suriyadakı müttəfiqlərinə hərbi dəstəyini artırması deməkdir.
Pentaqonun bu silah transferi ilə bağlı ilk xəbərləri Türkiyəyə yaxın müxalifət olan Suriya televiziyası verib. Xəbərə görə, ABŞ təlimatçıları Suriya Demokratik Qüvvələrinə (SDQ) bu sistemlərdən istifadəni öyrətməyə başlayıblar. Bu, xüsusilə pilotsuz uçuş aparatlarına qarşı effektiv müdafiəni təmin etməyi hədəfləyir.
Belə bir silahlanma hərəkəti təkcə kürdlərin nəzarətində olan bölgələr üçün deyil, həm də qonşu bölgələr üçün strateji nəticələr verməsi mümkündür.
İrana yaxın şiə qruplarının və kürdlərə müxalif ərəb qəbilələrinin təzyiqi altında olan SDQ bu hava hücumundan müdafiə sistemləri sayəsində müdafiə qabiliyyətini xeyli artıra bilər.
Bu vəziyyət Türkiyənin təhlükəsizlik narahatlıqlarını dərinləşdirir. Xüsusilə Türkiyə hökuməti Suriyanın şimal-şərqində kürd qüvvələrinin hərbi potensialının artırılmasının onun sərhəd təhlükəsizliyini təhdid edəcəyini düşünür.
Türkiyə bu bölgələrdə kürd qüvvələrini hədəf alaraq sərhədlərinin qorunmasına yönəlmiş əməliyyatlar keçirmək əzmini əvvəllər də dəfələrlə ifadə edib.
Rusiya mətbuatı yazır ki, ABŞ-ın kürdlərə verdiyi bu dəstək Türkiyənin Suriyada quru əməliyyatına başlamaq planlarını sürətləndirə bilər. Oktyabrda kürdlərin nəzarətində olan ərazilərə hava hücumları intensivləşdikdən sonra Ankara quru əməliyyatına başlayacağı ilə hədələmişdi.
Bu hadisələr göstərir ki, Türkiyə Suriyanın şimalına qarşı hərbi əməliyyatları artıra və bu bölgədə daha böyük qarşıdurmanı alovlandıra bilər.
Nəticə etibarı ilə ABŞ-ın kürdlərə hərbi dəstəyi bölgədəki tarazlığı dəyişdirə və Türkiyənin regional siyasətlərini yenidən formalaşdıra bilər.
Rusiya qəzetinin yazdığına görə, Qəzzadakı müharibənin beynəlxalq diqqəti yayındırması Türkiyənin bu fürsətdən öz maraqları üçün istifadə etmə ehtimalını artırır.
