"Hər bir dövlətin tarixinin, millətin genetik yaddaşının formalaşması zəncirinə möhkəm toxunmuş öz unudulmaz tarixləri və hadisələri var. Ukrayna üçün belə bir tarix, şübhəsiz ki, 24 avqust 1991 -ci ildir – yəni Ukrayna dövlətinin müstəqilliyini bərpa etdiyi gün".
Bu sözlər Ukraynanın ölkəmizdəki Səfiri Vladyslav Kanevskinin imzasıyla Hafta.az-a daxil olan məqalədə deyilir. Müəllif yazır ki, bu il Ukrayna müstəqilliyinin 30 illik yubileyini qeyd edir. Bu bayram Ukrayna xalqının birlik, müstəqillik və çiçəklənmə yolundakı çoxəsrlik səylərinin nəticəsidir.
"Ukrayna tarixində onun meydana gəlməsinin və inkişafının fərqli dövrləri olub: qüdrətli Kiyev rusundan tutmuş Monqol İmperiyasının hökumdarlığına qədər, azad Zaporojye Seçindən tutmuş Ukrayna ərazisinin Reç Pospolita və Moskva Çarlığı arasında bölünməsinə qədər, nəhayət, demokratik Ukrayna Xalq Respublikasından dövlətimizin məcburi şəkildə totalitar SSRİ-yə daxil edilməsinə qədər", - yazan səfir qeyd edir ki, 1991 -ci ildə Sovet imperiyası dağılandan sonra ukraynalılar Ukraynanın yeni tarixini yazmağa başlayıb. Şübhəsiz, Vətənin hazırkı formalaşma mərhələsində çoxlu qələbələr və məğlubiyyətlər, eniş -yoxuşlar, xəyanət və digər ölkələrin dəstəyi olub.
Məqalədə daha sonra deyilir: "Ukraynalıların 30 ildə ən böyük nailiyyəti milli şüurun, vətənpərvərlik hissinin artması və Ukraynada siyasi millətin formalaşması oldu. Əksər ölkələrlə etibarlı və tərəfdaşlıq əlaqələri qurmağı bacardıq. 136 ölkəyə vizasız səyahət edə bilərik. Yeni, döyüşə hazır Ukrayna Ordusu qurduq, Ukrayna iqtisadiyyatının məhsuldar potensialını və rəqabət qabiliyyətini qoruduq və öz Ukrayna Pravoslav Kilsəsinə sahib olmaq hüququnu qazandıq. Müasir Ukrayna dünya səviyyəli elmi fikirlər, riyaziyyat, kimya, tibb, nüvə fizikası, radioelektronika, biotexnologiya, yeni materialların inkişafı, İT, rabitə və telekommunikasiya sahəsində güclü elmi məktəblər yarada bilən güclü bir intellektual potensiala malikdir. Aerokosmik dizayn və istehsalın tam dövrünü təmin edə bilən dünyanın elit ölkələrindən biriyik, tank istehsalının tam dövrünü təmin edə bilən dünyanın beş ölkəsindən və dünyanın ən böyük gəmiqayırma ölkələrindən biridir. Ukraynada ağır texnika istehsalı, güc avadanlığı və alət istehsalı da daxil olmaqla digər yüksək texnologiyalı sənaye sahələri də inkişaf edib".
Diplomat yazır ki, Ukrayna çoxşaxəlidir: ölkə idmançıları, onların qazandığı uğurlarla da fəxr edirlər. 21 il ərzində dirəklə tullanma üzrə dünya rekordu görkəmli ukraynalı idmançı Sergey Bubka tərəfindən qorundu. 2004 -cü ildə Andriy Şevçenko "Qızıl top"u qazandı və Avropanın ən yaxşı futbolçusu seçildi. 2009-cu ildə "Şaxtyor" Donetsk UEFA Kubokunu qazandı və 2019-cu ildə 20 yaşına qədər olan gənclər komandası futbol üzrə Dünya Kubokunu qazandıqda bütün dünya Ukraynanı yenidən alqışladı. Dünyanın hər yerindən bir çox uşaq və yeniyetmə boksda inanılmaz uğurlar qazanmış Kliçko qardaşlarını özünə nümunə götürür.
Səfir qeyd edir ki, ukraynalılar oxuyan millətdir, mahnıları bütün dünyada sevilir və tanınır. Müstəqillik illərində ukraynalı ifaçılar iki dəfə Avropanın ən böyük mahnı müsabiqəsi olan "Eurovision"da qələbə qazandı: 2004-cü ildə Ruslana, 2016-cı ildə isə Camala birinci yeri tutdu.
"Bu gün qələbələrimizi xatırlamaq, nailiyyətlər haqqında yazmaq xüsusilə xoşdur. Ancaq Ukrayna xalqı atalarımızın uğruna qan tökdüyü azadlığa bu qədər dəyər verməsəydi, milli qürur üçün ön şərtlərimiz olardımı? Əslində Ukrayna xalqı hər zaman azadlıq arzusunda idi. Zaman dəyişdi, amma bir şey eyni olaraq qaldı və qalmaqda davam edir: azad olmaq istəyi. Ukraynalılar həmişə "cəsarət", "qürur", "müstəqillik", "dostluq", "qonaqpərvərlik" sözləri ilə əlaqələndirilib. Dostlarımız üçün qapılarımız hər zaman açıqdır, başqasının dərdləri həmişə qəlbimizdə əks-səda alır, köməyə və dəstəyə ehtiyacı olanlara arxa çevirməyəcəyik. Xalqımızın başqa bir yaxşı xüsusiyyəti, dostlarımızın uğurlarına və qələbələrinə ürəkdən sevinmək bacarığıdır. Ədalətsizliyin təzahürlərinə kəskin reaksiya veririk və dövlətimiz üzərində yaranan təhdidlərdən heç vaxt geri çəkilmirik. 2004-cü ildə ukraynalılar ədalətli və şəffaf seçki hüququnu müdafiə etdilər, demokratiya hüququnu müdafiə etdilər və 2013 -cü ildən bu günə qədər azadlığı və Avropa seçimini müdafiə etmək məcburiyyətindədirlər. Ləyaqət İnqilabı, Səma Yüzlüyü - xalqımızın qüruru və dərdidir! Maydan hadisələri hər birimizi, Ukraynanı dəyişdi. Təhlükə qarşısında möhkəmlənmə qabiliyyətimizi, bir snayperin gözü altında olsa belə, gələcək nəsillərimiz üçün daha yaxşı bir gələcəyi müdafiə etmək qabiliyyətimizi nümayiş etdirdi..." yazan səfir Kanevski qeyd edir ki, ukraynalılar birləşmiş və vətənpərvər millətdir. Artıq yeddinci ildir ki, dövlətlərini cəsarət və fədakarlıqla müdafiə edirlər. Hər gün minlərlə Ukrayna əsgəri soyuqda və istidə, 2014-cü ildə "yaşıl adamlar" adı altında, bayraqsız və dövlət mənsubiyyəti olmadan Ukrayna Krımını biabırçı şəkildə işğal edən rus işğalçılarını dəf etməyə davam edir. Daha sonra dünya ictimaiyyətinin diqqətini bu acınacaqlı və alçaq hərəkətdən yayındırmaq üçün Ukraynanın şərqində qanlı bir müharibə başlatdı. Bir vaxtlar sənayedə inkişaf etmiş və çiçəklənən Donetsk və Luqanska ölüm və dağıntılar gətirdi.
"Dövlətimiz üçün belə əlamətdar bir gündə veteranlarımız, Ukrayna qəhrəmanları, könüllülər, Ukrayna torpaqlarını Rusiyanın silahlı təcavüzündən müdafiə edib və indi də müdafiə edənlərin qarşısında baş əymək istəyirik. Dövlətimizin zəfər, şərəf və azadlıq qurbangahında canlarını qoyanların hamısı qarşısında baş əyirik! Rusiyanın ərazilərimizə, müstəqilliyimizə qarşı olan qəsdi Ukrayna dövlətinin inkişafına dair strategiyaya düzəlişlər etdi və bu gün də edir. Lakin, biz inanırıq ki, doğma torpağımıza olan sevgimiz, bir birimizə olan hörmətimiz, “yox etmək deyil, qurmaq” istəyimiz, təbii ki, beynəlxalq tərəfdaşlarımızın və dost ölkələrin dəstəyi müstəqil, demokratik gələcək uğrunda mübarizədə Ukraynaya qalib gəlməyə kömək edəcək!", - yazır səfir Kanevski.
Ukraynalı diplomat məqalənin sonunda yazır: "23-24 avqust 2021-ci il tarixləri Ukrayna üçün vacibdir. Dövlət Bayrağı Günü və Ukraynanın Müstəqillik Gününün qeyd olunmasından başqa, biz Ukraynanın işğal edilmiş torpaqlarının azad edilməsi və ərazi bütövlüyünün bərpa olunmasına, Rusiyanın Krım Muxtar Respublikası və Sevastopol şəhərini müvəqqəti işğal etməsi ilə yaranmış fəsadların aradan qaldırılması, habelə Ukrayna vətəndaşlarının hüquq və maraqlarının müdafiəsinə yönəlmiş beynəlxalq səyləri birləşdirəcək əsas xarici siyasi alət olan Krım platformasını işə salırıq. Kremlin yüksək səsli bəyanatları bizi qorxutmur. Biz oğrunun bizdən aldığın geri qaytarması üçün hər şey edəcəyik. Gün gələcək, Ukrayna bayrağı azad edilmiş Sevastopol və Ukrayna Krımının bütün ərazisi üzərində dalğalanacaq! Dövlətimizin gələcəyi hər birimizdən asılıdır! Qoy hamımız xarici çağırış və təhdidlər qarşısında kifayət qədər gücə sahib olaq! Qoy hamımız milli dəyərləri qorumaq və artırmaq, dövlətçiliyimizi qurmaq və möhkəmləndirmək üçün kifayət qədər vətənpərvərlik, fədakarlıq, ilham və müdrikliyə sahib olaq!
Birlikdə biz bacararıq!
Doğma Ukrayna, Müstəqillik Günün mübarək!
Yaşasın Ukrayna!.."
