Ukrayna Təhlükəsizlik Xidmətinin (UTX) “Alfa” Xüsusi Əməliyyatlar Mərkəzinin əsgərləri Kerç boğazı yaxınlığındakı Rusiya hava hücumundan müdafiə vasitələrinə, həmçinin müvəqqəti işğal edilmiş Krımdakı Saki və Qvardeyskoye hərbi aerodromlarının infrastrukturuna uğurlu zərbələr endiriblər.
Hafta.az xəbər verir ki, bu barədə Ukrayna Təhlükəsizlik Xidməti (UTX) “Telegram” kanalında məlumat verib. İlkin məlumatlara görə, Saki aerodromunda keçirilən xüsusi əməliyyat zamanı dörd təyyarə anqarına ziyan dəyib.
Kerç yaxınlığında iki S-400 zenit-raket sistemi və iki “Pantsir-S1” zenit-raket və top sistemi məhv edilib. Bu, UTX “Alfa” mərkəzi tərəfindən ərazidə məhv edilən dördüncü “Pantsir-S1”dir.
“Rusiya qoşunları Krım üzərindəki səmada nəzarəti itirir. Hər bir məhv edilmiş hava hücumundan müdafiə sistemi və zədələnmiş hərbi aerodrom düşmənin hərbi infrastrukturuna qarşı Ukraynanın növbəti zərbələri üçün yeni imkanlar açır. UTX Krımı Rusiya ordusu Ukrayna yarımadasından çıxana qədər metodik olaraq daimi itkilər ərazisinə çevirməyə davam edəcək”, -deyə UTX bildirib.
