Rusiyanın rəsmi statistika agentliyi olan “Rosstat”ın hesabatına əsasən, ölkə əhalisinin sayı növbəti 23 il ərzində 7,5 milyon nəfər azalcaq. Müvafiq olaraq, Rusiyada əhalinin təbii azalmasının 2046-cı ilə qədər davam edəcəyi proqnozlaşdırılır.
Hafta.az-ın yazdığına görə, digər tərəfdən, doğum nisbətinin 2028-ci ildə yenidən artmağa başlaması gözlənilir. Lakin bu ümumi mənzərəni dəyişmək üçün kifayət etməyəcək.
“Rosstat”ın hesabatına görə, 2046-cı ilə qədər ölkədə təxminən 139 milyon insan yaşayacaq. Bu il yanvarın 1-i üçün müəyyən edilmiş əhali ilə müqayisədə bu rəqəm 7,5 milyon nəfərdən azdır.
“Rosstat” 2024-cü ildən 2045-ci ilə qədər əhalinin hər il orta hesabla 332 min nəfər azalacağını və miqrasiyanın artmasının təbii azalmanı kompensasiya edə bilməyəcəyini proqnozlaşdırır.
2023-cü il yanvarın 1-nə Rusiyada 146,45 milyon insan yaşayırdı. “Rosstat”a görə, 2046-cı il yanvarın 1-nə qədər əhalinin sayı 138,77 milyon nəfərə qədər azalacaq.
“Rosstat”, orta ömür uzunluğunun 2023-cü ildə 73,1 il, 2045-ci ildə isə 79,8 yaşa yüksələcəyini proqnozlaşdırır. Eyni zamanda, “Rosstat”ın məlumatına görə, 2045-ci ildə qadınların ömür uzunluğu 83,2, kişilər üçün isə 75,9 il olacaq.
BMT-nin məlumatına görə, 1994-2021-ci illər arasında Rusiyanın əhalisi 6 milyon nəfər azalaraq 149 milyondan 143 milyona düşüb. Yenə BMT-nin hesablamalarına əsasən, Rusiyada mövcud demoqrafik tendensiya davam edərsə, 2050-ci ilə qədər əhalinin sayı 120 milyona qədər enə bilər.
