ABŞ-ın Kolorado ştatında bir şirkət başqa bir şirkətə olan 23500 dollarlıq borcunu üç ton sikkə ilə ödəyərək qisas almaq istəyir.
Hafta.az-ın yazdığına görə, JMF Enterprises şirkəti Fired Up Fabrication MMC-yə olan borcunu təxminən 3 ton ağırlığında sikkələrlə ödəmək istəyib. İddiaçının vəkili Daniell Bim, borcun sikkələrlə ödənilməsi tələbini “simvolik orta barmaq” jesti kimi gördüklərini bildirib.
Minlərlə sikkə təxminən 6 həftə əvvəl bir pikapda şirkətin vəkili Daniell Bimin ofisinə çatdırılıb.
Bim deyib ki, yük maşını sürücüsü ona qutuların sikkələrlə dolu olduğunu və JMF vəkilinin onları daşımaq üçün forkliftə ehtiyac duyacağını söyləyib.
JMF tikinti layihəsində işləmək üçün Fired Up şirkətini subpodratçı kimi işə götürüb. Lakin iş bitdikdən sonra şirkətə pul verilmədiyi iddia edilir.
İyulda aparılan vasitəçilik danışıqlarında JMF subpodratçıya 23500 dollar ödəməyə razılaşıb, lakin onun necə ödəyəcəyi barədə dəqiq heç nə deməyib. Digər tərəfdən, JMF-nin vəkilləri məhkəmədən iddiaçıların sikkələrlə ödənişi qəbul etmələrini təmin etməyi istəyirlər.
Ofisinin yerləşdiyi binadakı liftin bu yükü daşıya bilməyəcəyini bildirən Bim, istəsə belə ödənişi qəbul edə bilməyəcəyini söylədi.
Vasitəçi müqaviləsində ödəniş üsulu ilə bağlı xüsusi şərtlərin olmadığını bildirən JMF-nin hüquq qrupu iddiaçıya sataşmaq, vaxt itirmək və razılaşmanın qarşısını almaq niyyətlərinin olmadığını iddia edib.
Bim, qarşı tərəfin bu hərəkətinin çox güman ki, əks nəticə verəcəyini və ötən həftə keçirilən iclasda hakimin bu vəziyyəti "pis niyyətli" gördüyünü ifadə edib.
