İranda etiraz aksiyaları zamanı saxlanılanların vəziyyətinə nəzarət edən komitə ötən həftə Məhsa Əmininin ölümünün birinci ildönümündə Tehran və digər şəhərlərdə azı 600 qadının saxlanıldığını bildirib.
Hafta.az-ın yazdığına görə, komitədən verilən açıqlamada saxlanılanların əksəriyyətinin zaminə buraxıldığı, bir çoxunun da eyni ümidlə prokurorluğa sövq edildiyi bildirilib.
İran mediasına görə, istintaq prosesinin tamamlanmasını və taleyinin müəyyənləşdirilməsini gözləyərkən 130 qadın Karçak həbsxanasına köçürülüb.
Komitə qeyd edib ki, etirazçıların küçələrə çıxmasının qarşısını almaq üçün təhlükəsizlik qüvvələri tərəfindən həyata keçirilən ciddi tədbirlər zamanı saxlanılan 118 qadının şəxsiyyəti müəyyən edilib.
Xatırladaq ki, iranlı kürd əsilli gənc qadın Məhsa Əmini qaydalara uyğun olaraq hicab taxmadığı üçün əxlaq polisi tərəfindən saxlanılıb. 22 yaşlı qadın 3 gün sonra təcridxanada müəmmalı şəkildə dünyasını dəyişib. Onun ölümü ilə bağlı qəzəb həftələrdir davam edən etirazlara səbəb olub, xüsusən də qadınların rəhbərlik etdiyi, rejimə açıq etiraz edən qadınların hicablarını açması kimi tabuları pozub.
Norveçdə yerləşən İran İnsan Haqları Təşkilatının (IHR) məlumatına görə, 68-i uşaq və 49-u qadın olmaqla, 551 etirazçı təhlükəsizlik qüvvələri tərəfindən öldürülüb, 22 mindən çox adam saxlanılıb. IHR qeyd edib ki, bu, bir neçə aydan sonra etirazların sürətini azaldıb.
Məhsa Əmininin ölümünün ildönümündə yüzlərlə qadının saxlandığına dair bəyanatla bağlı İran hökuməti və ya məhkəmə sistemindən heç bir açıqlama verilməyib. BBC Fars-ın məlumatına görə, məcburi hicaba etiraz edən mühəndis Zeynəb Kazemi saxlanılıb.
Kazemi bu ayın əvvəlində İran Mühəndislər Birliyinin Baş Assambleyasını seçmək üçün təşkil etdiyi konfransda baş örtüyü çıxardığından 74 şallaq cəzasına məhkum edilmişdi.
Kazemi Məhsa Əmininin vəfatının ildönümündə yeni klip çəkdirib və haqsızlığa qarşı ədalət tələbini dilə gətirdiyinə görə heç vaxt peşman olmadığını, susmayacağını bildirib.
Polis və təhlükəsizlik qüvvələri etirazlarda həyatını itirənlərin ailələrinin nümayiş təşkil etməməsi üçün sərt tədbirlər görüb. Qəzvin şəhərində təhlükəsizlik qüvvələri həyatını itirənlərin xatirəsini yad etməyə çalışan insanları dağıtmaq üçün gözyaşardıcı qazdan istifadə edib.
Ötən il təhlükəsizlik qüvvələri tərəfindən öldürülən Cavad Heydərinin bacısı Fatimə Heydəri bildirib ki, polis onların evini mühasirəyə alıb və hər hansı anım mərasimini dağıtmaq üçün gözyaşardıcı qazdan istifadə edib.
Yada salaq ki, İran parlamenti çərşənbə axşamı hicab qadağasına əməl etməyən qadınlara daha sərt cəzalar nəzərdə tutan qanun layihəsini təsdiqləmək üçün səs verib. Hicab qadağasını pozanların cərimələnməsi, bank xidmətlərinin bloklanması və qanuni tədbirlərin görülməsini nəzərdə tutan qanunun 3 il sınaq müddətində tətbiq olunacaq.
-1782311317.jpg&h=173&w=263&zc=1&q=80)
