Azərbaycan 30 ildə həm işğalla, həm də beynəlxalq riyakarlıqla mübarizə apardı - Könül Nurullayeva

13:39 22.09.2021 Müəllif:Azad Əliyev
Yazını böyüt
Yazını kiçilt

Ötən il sentyabrın 27-də başlayan 44 günlük Vətən müharibəsinin Azərbaycanın qələbəsi ilə başa çatması ilahi ədalətin qələbəsi idi. Çünki Azərbaycan 30 il ərzində işğalla yanaşı, həm də beynəlxalq riyakarlıqla mübarizə aparırdı.

Bu fikirləri hafta.az-a millət vəkili Könül Nurullayeva deyib. 

Onun sözlərinə görə, münaqişənin nizamlanması məqsədilə 24 mart 1992-ci ildə təsis olunmuş ATƏM-in (indiki ATƏT) Minsk Qrupu 29 il ərzində məsələnin həllinə yox, dondurulmasına çalışdı:

"Bu yanaşma illər ərzində sülh danışıqlarının nəticəsiz davam etməsinə səbəb oldu. Açıq şəkildə işğalçı ilə işğala məruz qalmış tərəf arasında fərq qoyulmadı. Beynəlxalq qətnamələr kağız üzərində qaldı. Halbuki Azərbaycan daim öz məsuliyyətini dərk edən ölkə kimi beynəlxalq hüquqa sadiqliyini nümayiş etdirdi, münaqişənin danışıqlar vasitəsilə həllinə çalışdı. Dünyanın ən nüfuzlu təşkilatı olan BMT də işğalçı Ermənistana təzyiq göstərməkdə acizlik nümayiş etdirdi. Əvəzində tərəfləri sülhə çağıran bəyanatlar səsləndirməklə işini bitmiş hesab etdi. Nəticə etibarı ilə BMT Təhlükəsizlik Şurasının Ermənistan silahlı qüvvələrinin Azərbaycanın işğal olunmuş ərazilərindən dərhal çıxarılmasını tələb edən 4 qətnaməsi 27 il kağız üzərində qaldı. Ən dəhşətlisi isə budur ki,
beynəlxalq miqyasda sərgilənən riyakarlıq işğalçının əl-qolunu açır, Azərbaycan ərazilərində törədilən erməni təxribatlarının miqyası genişlənirdi. Bu azmış kimi təmas xətti boyunca yaşayan dinc əhali mütəmadi atəşə məruz qalırdı. Amma bununla belə beynəlxalq ictimaiyyət də, Ermənistan da dərk edirdi ki, Azərbaycan heç bir halda işğalla, təslimçi sülhlə barışmayacaq. 2016-cı il aprel döyüşləri, 2020-ci il iyul ayında Tovuz döyüşləri bunu bir daha təsdiqləyirdi. Lakin düşmən nəticə çıxarmaq istəmirdi, çünki 30 il davam edən ikili standartlardan çıxış edən havadarlarına güvənirdi. 44 günlük savaş isə həm ermənilərə, həm də onun havadarlarına dərs oldu. Bir daha təsdiqləndi ki, Azərbaycanın gücü, hərbi potensialla yanaşı milli həmrəylikdə və peşəkar rəhbərlikdədir. Bu müddətdə Azərbaycan haqq işinə təzyiqli yanaşmaların da şahidi olduq. Cəmiyyətin parçalanmasına çalışan xarici dairələrin cəhdləri boşa çıxdı. Vətən müharibəsi zamanı siyasi partiyaların Ali Baş Komandan İlham Əliyevə dəstək ifadə edən birgə bəyanat və müraciətlər imzalaması milli məsələlərdə ölkədə hər hansı fikir ayrılığının olmadığını bir daha təsdiqlədi. Təsadüfi deyil ki, siyasi partiyalar tərəfindən ümumilikdə 8 birgə bəyanat və 2 müraciət imzalandı. Eyni zamanda
müharibə dövründə 16 beynəlxalq təşkilata Azərbaycan ziyalılarının və vətəndaş cəmiyyəti üzvlərinin, 50 siyasi partiyanın
müraciəti oldu. Beləliklə, 30 il işğala göz yumub ikili standartlar nümayiş etdirən destruktiv qüvvələr milli həmrəylik nəticəsində zərərsizləşdirildi. Çünki Qarabağ Azərbaycan xalqı üçün hər zaman milli qürur məsələsi olub. 44 günlük Vətən müharibəsində Ordumuzun qəhrəmanlığı, Ali Baş Komandanın qətiyyəti ermənilərin və havadarlarının bölgədəki siyasətini iflasa uğratdı. Azərbaycan öz haqqını və tarixi ədaləti təmin etdi".

Oxunma sayı 31
Siyasət rubrikasından digər xəbərlər