Bu ilin yanvar-may dövründə Cənubi Koreyada intihar halları illik bazda 10,1 faiz artıb.
Hafta.az-ın rəsmi xəbər agentliyi “Yonhap”a istinadən yazdığına görə, Cənubi Koreya hökuməti tərəfindən açıqlanan, Səhiyyə və Rifah Nazirliyi tərəfindən toplanan məlumatlara görə, 2023-cü ildə intihar hadisələrinin ümumi sayının təxminən 13770 olduğu təxmin edilir.
Cənubi Koreya Səhiyyə Nazirliyi bu il intihar hadisələrinin artmasını Covid-19 epidemiyasından sonra sosial izolyasiya, iqtisadi çətinliklər və depressiya ilə əlaqələndirib. Nazirlik onu da bildirib ki, ötən ilin dekabrında bir məşhurun intiharından sonra “imitasiya intihar effekti” kimi tanınan hadisə də buna səbəb ola bilər.
Məlumata görə, Cənubi Koreyada 2020-ci ildə intihar nisbəti hər 100 min nəfərə 24,1 hadisə kimi qeydə alınıb. Bu göstərici İqtisadi Əməkdaşlıq və İnkişaf Təşkilatı ölkələri üçün orta hesabla 10,7 hadisədən iki dəfə yüksəkdir.
Bu vəziyyətdən sonra Cənubi Koreyanın Səhiyyə və Rifah Nazirliyi müvafiq nazirliklər və qeyri-hökumət təşkilatları ilə görüş keçirərək intiharların qarşısının alınması üçün lazımi tədbirləri müzakirə edib.
