Çadda kəndlilər adam oğurluğunun qarşısını almaq üçün ox və yay döyüşü təlimi alırlar.
Hafta.az-ın AFP-yə istinadən yazdığına görə, Çadın cənub-qərbindəki Mayo-Kebbi Ouest bölgəsində dəstələr tərəfindən adam oğurluğuna qəzəblənən kəndlilər müqavimət göstərməyə başlayıblar. Bildirilib ki, 20 ildir bu problemdən əziyyət çəkən kənd sakinləri artıq müdafiə üçün Çad dövlətinə və ya polisinə etibar etmirlər. Kəndlilər kiçik müqavimət qrupları yaradaraq, onlara nizə və sapand, həmçinin ox və yay ilə döyüşməyi öyrədiblər.
Qruplardan birinin rəhbəri Amos Mbairo Nangyo fəaliyyəti ilə bağlı deyib: "Biz mülki kəşfiyyat agentləri kimiyik. Biz qubernatorun və təhlükəsizlik qüvvələrinin gözü və qulağıyıq, onlara məlumat çatdırırıq".
35 yaşlı Nanqyo cinayətkarları görən kimi hücuma keçdiklərini və “biz də onların arxasınca yay və nizə ilə gedirik” deyib. Təlimatçı zərurət yarandıqda jandarmı mühafizə etdiklərini də bildirib.
Nanqyo hökumətin terror hücumları ilə məşğul olduğunu və bu problemlə lazımi səviyyədə məşğul olmadığını bildirib. Çad xüsusilə Boko Haram tərəfindən həyata keçirilən hücumlarla mübarizə aparır. Bazar ertəsi Çad gölü hövzəsində keçirilən əməliyyatda 70 Boko Haram döyüşçüsü öldürülüb.
Kəndlilərin ehtiyaclarını qarşılamaq üçün çalışan bir hüquq təşkilatı olan İnkişaf Təşəbbüslərinə Dəstək Təşkilatından Barka Tao, qaçırılan insanların dəqiq sayının bilinmədiyini və 20 ildə ən azı 1500 hadisənin ola biləcəyini söyləyib.
Bu fəaliyyətin hədəfinin əvvəlcə Afrikanın ən sıx yaşayan etnik qruplarından biri olan Fulanilər olduğunu ifadə edən Tao, son 10 ildə fermer və müəllimdən qeyri-hökumət təşkilatı işçilərinə qədər bir çox insanın qaçırıldığını deyib.
Tao həmçinin qaçaqmalçıların kəndlərdə təhlükəsizlik qüvvələri və ya səlahiyyətlilərlə razılaşmalar edərək hücumlar həyata keçirdiklərini də bildirib.
Çadın təhlükəsizlik naziri Mahamat Çarfadin Margui iddiaları təsdiqləyib. O, keçən ilin mart ayında vəzifəyə gəldiyi gündən bəri cinayətkarlarla əməkdaşlıq edən qubernatorları və jandarm komandirlərini işdən çıxardığını bildirsə də, əslində problemin daha mürəkkəb olması ilə razılaşıb.
Kamerun və Mərkəzi Afrika Respublikasından olan dəstələrin də adam oğurluğu ilə məşğul olduğuna diqqət çəkən nazir, ordunun 2020-ci ildən sərhəd təhlükəsizliyi üçün gücləndirildiyini, lakin bunun kifayət qədər effekt vermədiyini bildirib.
