Rusiyada kitab bazarı son illər ciddi dəyişikliklərə məruz qalır. Profile.ru-nun Rusiya Kitab Palatasının məlumatlarına əsaslanaraq verdiyi xəbərə görə, 2023-cü ildə ölkədə ümumilikdə 96,3 min kitab və broşür nəşr edilib. Lakin bu rəqəmlər əvvəlki illə müqayisədə 10,9 faiz azalma göstərir.
Hafta.az-ın yazdığına görə, 2022-ci ildə nəşr olunan kitabların sayı 108,1 min ədəd olduğu halda, 2023-cü ildə bu rəqəm xeyli azalıb. Bundan əlavə, ümumi nəşr tirajı 14,64 faiz azalaraq 335 milyon ədədə düşüb.
Kitab nəşri ilə məşğul olan şirkətlərin sayı da azalmağa meyllidir. 2023-cü ilə qədər Rusiyada 4382 nəşriyyat fəaliyyət göstərir, lakin 2022-ci ildə bu rəqəm 4450 olub. Xüsusilə, ildə 100-dən çox kitab nəşr edən nəşriyyatların sayı 2022-ci ildə 152 olduğu halda, 2023-cü ildə bu rəqəm 125-ə enib.
Digər tərəfdən, sektorun maliyyə göstəriciləri daha müsbət mənzərə yaradır. 2023-cü ildə kitab sənayesinin ümumi gəliri 2022-ci illə müqayisədə 9,6 faiz artaraq 120,35 milyard rubla (1,3 milyard dollar) çatıb. Bu artıma baxmayaraq, satılan kitabların sayında azalma olub. Məsələn, 2024-cü ilin birinci rübündə satılan kitabların sayı 3 faiz aşağı düşüb. Xüsusilə, uşaq və maarifləndirici kitabların satışı 24 faiz-ə qədər azalıb.
Kitab qiymətlərinin artmasının əsas səbəblərindən biri də kağız və çap xərclərinin artmasıdır. 2022-ci ildə Qərb kağız tədarükçülərinin bazardan çıxarılması və xüsusilə Finlandiya kimi ölkələrin Rusiyaya qarşı sanksiyalar tətbiq etməsi kağız qiymətlərinin əhəmiyyətli dərəcədə artmasına səbəb olub. Bu, kitabların qiymətini artırdı və nəticədə pərakəndə satış qiymətləri 20 faizə qədər artdı.
Nəhayət, kitab sənayesindəki bu böhran və qiymət artımları rəqəmsal kitablara marağı artırdı. Elektron kitablar ənənəvi çap kitablarından daha sərfəli qiymətlərlə təklif olunur ki, bu da rəqəmsal nəşrin yüksəlişinə töhfə verir.
