Mərakeşin Ədliyyə Nazirliyi bildirib ki, kralı VI Məhəmməd qanunsuz çətənə yetişdirilməsi ilə bağlı cinayətlərə görə məhkum edilmiş, mühakimə olunan və ya axtarışda olan 4800-ə yaxın adamı əfv edib.
Hafta.az-ın yazdığına görə, Mərakeşin çətənə tənzimləmə agentliyi Anrac-ın rəhbəri Məhəmməd əl-Guerruj “Reuters”ə bildirib ki, amnistiyanın məqsədi fermerləri "gəlirlərini və yaşayış şəraitlərini yaxşılaşdırmaq üçün çətənə becərilməsinin qanuni prosesində iştiraka təşviq etməkdir. Bu, fermerlərə və onların ailələrinə sülh və əmin-amanlıq içində yaşamağa, öz işlərini qanuni şəkildə həyata keçirməyə imkan verəcək müstəsna təşəbbüsdür".
Birləşmiş Millətlər Təşkilatının məlumatına görə, Şimali Afrika ölkəsi Mərakeş dünyanın aparıcı çətənə istehsalçısıdır.
2021-ci ildə hökumət fermerləri dəstəkləmək üçün şimal-şərq Rif bölgəsindəki kənd əyalətlərində tibbi və sənaye məqsədləri üçün çətənə becərilməsini qanuniləşdirən qanun qəbul edib.
Çətənə əsrlər boyu yoxsul ölkənin bu baxımsız dağ bölgəsində becərilir və rəsmi hesablamalara görə, 80-120 min ailənin gəlir mənbəyidir.
Qanun həm də çətənənin ticarətində və ixracında üstünlük təşkil edən narkotiklərin qanunsuz dövriyyəsinin qarşısının alınması məqsədi daşıyır.
Nazirlikdən verilən açıqlamada amnistiyanın qeyri-qanuni çətənə becərilməsi ilə məşğul olanların “yeni strategiyaya inteqrasiyasına” imkan verəcəyi bildirilib.
Yeni qanunun bir hissəsi olaraq 2022-ci ildə qurulan Anrac, 2024-cü ilin əvvəlindən bəri verilən çətənə ilə əlaqəli lisenziyalarda təəccüblü bir artım olduğunu bildirib.
“World Morocco News” xəbər verir ki, agentlik avqust ayında 3 minə yaxın icazəni təsdiqlədiyini açıqlayıb ki, bu da 2023-cü ildə verilən 609 icazə ilə müqayisədə böyük artım deməkdir.
2021-ci il qanunu çətənədən əyləncə məqsədli istifadəni qadağan etsə də, Avropa İttifaqının Narkotiklər Agentliyi və Europol-un məlumatına görə, Mərakeş 2024-cü ildən etibarən qeyri-qanuni çətənə bazarı üçün Avropanın ən böyük tədarükçüsü olaraq qalır.
