Nil çayını araşdıran tədqiqatçılar Qədim Misir fironlarını təsvir edən qayaüstü təsvirlər tapdılar. Əsvan yaxınlığında edilən kəşf zamanı heroqliflər də aşkarlanıb.
Hafta.az-ın “Live Science”a istinadən yazdığına görə, tikintisinə 1960-cı ildə başlanan Əsvan bəndi Qədim Misir dövrünə aid bəzi arxeoloji sahələrin su altında qalmasına səbəb olub. Birləşmiş Millətlər Təşkilatının Təhsil, Elm və Mədəniyyət Təşkilatı (UNESCO) bölgədən mümkün qədər çox tarixi əsəri çıxarmağa çalışıb.
Gərgin səylərə baxmayaraq, artefaktların əksəriyyətini vaxtında köçürmək mümkün olmadı, lakin yeni tapıntılar düşündüyümüzdən daha çox arxeoloji qalıqların xilas edildiyini göstərir.
Misirin Turizm və Qədim Əsərlər Nazirliyi iyulun 17-də Misir və Fransa arxeoloqlarından ibarət qrupun su altında müxtəlif qayaüstü təsvirlər və yazılar aşkar etdiyini açıqlayıb. Yeni aşkar edilmiş qayaüstü təsvirlər arasında III Amenhotep, IV Tutmos, II Psamtik və Hofra kimi fironların təsvirləri var. Bunlardan ilk ikisi təxminən eramızdan əvvəl 1400 - 1352-ci illərdə, digər ikisi isə eramızdan əvvəl 595 - 570-ci illərdə hökm sürüb.
Açıqlamada oymaların və heroqliflərin yaxşı qorunduğu bildirilsə də, yazıların məzmunu ilə bağlı ətraflı məlumat verilməyib.
Tədqiqatçılar hazırda sualtı artefaktların təsvirlərini təfərrüatlı şəkildə qeyd etməyi hədəfləsələr də, gələcək dalışlarda daha çox artefaktın tapılacağı gözlənilir.
Tədqiqata cəlb edilməyən ekspertlər bildirirlər ki, tapıntılar maraqlı olsa da, onların nə qədər vacib olduğunu anlamaq üçün daha çox məlumat lazımdır.
Qədim Misir dövründə ölkənin cənub sərhədinə yaxın olan Əsvan mühüm strateji əhəmiyyət daşırdı. Ticarət yolu üzərində yerləşən şəhər həm də hərbi baza kimi xidmət edirdi.
Əsvan Əbu Simbel kimi məbədlərə ev sahibliyi edərkən, II Ramsesin hər birinin hündürlüyü 21 metrə çatan 4 nəhəng heykəli də burdadır.
