ABŞ-ın Qazaxıstandakı səfiri Daniel Rozenblyumun iştirakı ilə şəhərdə Müdafiə Nazirliyinə bağlı sülhməramlı əməliyyatlar mərkəzinin açılması xəbəri Kremldə narahatlıq yaradıb.
Hafta.az-ın yazdığına görə, Kremlin sözçüsü Dmitri Peskov bildirib ki, Kreml Qazaxıstanda “NATO mərkəzi”nin açılması ilə bağlı Astanadan açıqlama gözləyir. Peskov daha ətraflı məlumatların toplanması lazım olduğunu bildirib və əlavə edib ki, Moskva Astanadan əlavə məlumat alacağına inanır.
Sonrakı saatlarda Qazaxıstan Müdafiə Nazirliyinin verdiyi açıqlamada Almatıda NATO mərkəzinin açılması ilə bağlı məlumatlar təkzib edilib. RİA Novosti-nin məlumatına görə, nazirlik ABŞ-ın Qazaxıstandakı səfiri Daniel Rozenblyumun iştirakı ilə şəhərdə Müdafiə Nazirliyinə bağlı sülhməramlı əməliyyatlar mərkəzinin açıldığını açıqlayıb.
Müdafiə Nazirliyinin məlumatına görə, mərkəz 2006-cı ildən Qazaxıstan silahlı qüvvələrinin sülhməramlı komponentinin inkişafı üçün təlim müəssisəsi kimi fəaliyyət göstərir. Müdafiə Nazirliyi əlavə edib ki, Almatıdakı mərkəz oktyabrın 23-də açılıb.
O, əlavə edib ki, mərkəz Qazaxıstanın dövlət qurumudur və sülhməramlı əməliyyatlarda iştirak edəcək hərbi, polis və mülki şəxsi heyətə, xüsusən də BMT standartlarına uyğun olaraq, dil təhsili və təlimi, beynəlxalq humanitar hüququn əsasları və sülhməramlı fəaliyyətlə bağlı hüquqi baza müddəalarını öyrədəcək. Qurum eyni zamanda Beynəlxalq Sülhməramlı Təlim Mərkəzləri Assosiasiyasının (IAPTC) üzvüdür.
Oktyabrın 25-də Almatıda sülhməramlıların hazırlanması üçün “NATO mərkəzi”nin açıldığı barədə əvvəllər bəzi KİV-lərdə məlumat yayılmışdı.
