Qlobal temperaturun 1 dərəcə artması Rusiyanın ümumi ölkədaxili məhsuluna 1,2 trilyon rubl (13 milyard dollar) artım gətirir. Bu proqnoz Rusiya İctimai İqtisadiyyatın Proqnozlaşdırılması İnstitutunun (INIP) dərc etdiyi hesabatda yer alıb. 2023-cü ilin sonuna olan məlumatları nəzərə alsaq, bu məbləğ ÜDM-in təxminən 0,7 faizinə uyğundur.
Hafta.az-ın RBC qəzetinə istinadən yazdığına görə, qlobal istiləşmə kənd təsərrüfatı və Şimal dəniz yolu vasitəsilə Rusiya iqtisadiyyatına töhfə verə bilər.
Hesabatda iqlim dəyişikliyinin Rusiya iqtisadiyyatına təsirinin ümumilikdə müsbət olacağı və potensial faydaların mümkün zərərdən daha çox olduğu vurğulanır. Xüsusilə tikinti sənayesi iqlim dəyişikliyi ilə mübarizə çərçivəsində həyata keçiriləcək uyğunlaşma layihələri sayəsində böyük gəlirlər əldə edə bilər. Hesabat müəlliflərinin fikrincə, infrastrukturun yenilənməsi və adaptasiya layihələrinin həyata keçirilməsi tikinti sektorunun artımına töhfə verəcək.
Rusiyada son on ildə orta temperatur artımı 0,5 dərəcə olduğu halda, Arktika bölgələrində bu göstərici 0,7 dərəcəyə çatıb. Tədqiqatçılar 2040-cı ilə qədər temperaturun 1 dərəcə artacağını proqnozlaşdırırlar.
Bununla belə, hesabatda qlobal istiləşmənin yaratdığı sağlamlıq problemləri, xüsusilə istidən qaynaqlanan ürək və tənəffüs xəstəlikləri nəticəsində yaranan ölümlər kimi mənfi təsirlər də diqqətdən kənarda qalmır. Bununla belə, qışın soyuması səbəbindən ölüm nisbətlərinin azalması kimi müsbət amillər bu mənfi təsirlərin bir qismini kompensasiya edə bilər.
