“Rusiya hökumətinin yeni viza qaydaları xarici turistlərə təsir etməyəcək”.
Hafta.az-ın yazdığına görə, bu barədə Rusiya Turizm Sənayesi Assosiasiyasının Beynəlxalq Əməkdaşlıq Komitəsinin sədri Sergey Voytoviç məlumat verib. Voytoviç bu qaydaların yalnız şəxsi, kommersiya və ya uzunmüddətli səfərlər üçün gələn xarici vətəndaşları əhatə etdiyini, turist vizası müraciətlərinə şamil olunmadığını bildirib. Qurum elektron vizalarla bağlı qaydalara bunun təsir etmədiyini də vurğulayıb.
Baş nazir Mixail Mişustinin avqustun 15-də imzaladığı sərəncama əsasən, Rusiyaya viza üçün müraciət edən əcnəbilər artıq müsahibədən keçməlidirlər. Bu müsahibə səfərin məqsədini və ərizəçinin ölkədə qalma şərtlərini yoxlamaq üçün aparılacaq. Rusiya Xarici İşlər Nazirliyi tətbiqin ölkəyə daxil olmamalı olan şəxslərin müəyyən edilməsini daha effektiv edəcəyini açıqlayıb.
Rusiyaya daxil olmaq üçün viza tələb edən ölkələrə əksər Avropa ölkələri, ABŞ, Kanada, Avstraliya, bəzi Afrika və Cənubi Amerika ölkələri daxildir. Bununla belə, Müstəqil Dövlətlər Birliyi (MDB) ölkələri, Kuba və Venesuela kimi ölkələrlə vizasız giriş müqavilələri var.
2023-cü ilin avqustundan etibarən 55 ölkənin vətəndaşları Rusiyaya daxil olmaq üçün elektron viza üçün müraciət edə bilərlər. Bu ölkələr arasında Türkiyə də var.
