Səudiyyə Ərəbistanı Xarici İşlər nazirinin müavini Əbdülhadi Mənsuri rəqəmsal xidmətlərin inkişafı və asan giriş üçün “Saudi Arabia Visa” (ksavisa.sa) adlı platformanın yaradıldığını açıqlayıb.
Hafta.az-ın yazdığına görə, Mənsuri dünən keçirilən Rəqəmsal Hökumət Forumunda verdiyi açıqlamada, platformanın Həcc, Ümrə, turizm və iş vizası da daxil olmaqla vizaların alınması prosesini asanlaşdırmaq üçün 30-dan çox dövlət və özəl təşkilata qoşulduğunu söyləyib.
Nazir müavini məlumatların etibarlılığını yoxlamaq, platformanın səmərəliliyini artırmaq, dövlət qurumları ilə iş və qərar qəbuletmə mexanizmlərini təkmilləşdirmək üçün süni intellekt və yeni yaranan texnologiyalara imkan yaradıldığını bildirib. O, həmçinin bildirib ki, vizaların alınması xidmətlərinin göstərilməsi üçün bir çox dövlət qurumları ilə işləmək üçün hazırlanmış vahid mexanizmlər mövcuddur.
Mənsuri, Rəqəmsal Dövlət Təşkilatının bir çox ictimai qurumun iştirakı ilə 'Gələcəyimiz indi' şüarı ilə iki gün davam edəcək 2-ci Rəqəmsal Dövlət Forumunu təşkil etdiyini söyləyib. Bildirib ki, forumun məqsədi dövlət qurumlarının nailiyyətlərini vurğulamaq, uğur hekayələrini nəzərdən keçirmək və rəqəmsal icma liderlərinə görüşmək, ünsiyyət qurmaq, təcrübə mübadiləsi və tərəfdaşlıq qurmaq imkanı verməkdir.
Mənsuri həmçinin bildirib ki, forumda rəqəmsal hökumətin çətinlikləri və gələcək istiqamətləri müzakirə olunacaq, müasir qabaqcıl təcrübələr araşdırılacaq və bu mövzuda Səudiyyə Ərəbistanında investisiya imkanları haqqında məlumat alınacaq.
